അമേരിക്കൻ ഓയിൽ & ഗാസ് കമ്പനി കേരളത്തിലേക്ക് - മന്ത്രി പി രാജീവ്

മന്ത്രിയുടെ ഫേസ് ബുക്ക് പോസ്റ്റ് ചുവടെ:- അമേരിക്ക ആസ്ഥാനമായി ഓയിൽ ആൻ്റ് ഗ്യാസ് മേഖലയിൽ പ്രവർത്തിക്കുന്ന ഏറ്റവും വലിയ ടെക്നോളജി ദാതാക്കളായ NOV Inc(നാഷണൽ ഓയിൽ വെൽ) കമ്പനി ഇന്ത്യയിലെ ആദ്യത്തെ ഗ്ലോബൽ ക്യാപ്പബിലിറ്റി സെൻ്റർ കേരളത്തിൽ ആരംഭിച്ച സന്തോഷം മുഴുവൻ മലയാളികളുമായി പങ്കുവെക്കുകയാണ്. 52 രാജ്യങ്ങളിലായി 32000ത്തിലധികം പേർക്ക് തൊഴിൽ നൽകുന്ന സ്ഥാപനം ഇന്ത്യയിലും നിരവധി സ്ഥലങ്ങൾ പ്രഥമഘട്ടത്തിൽ പരിശോധിച്ചതിന് ശേഷമാണ് കേരളം തെരഞ്ഞെടുത്തത്. കൊച്ചി ഇൻഫോപാർക്കിലെ ലുലു സൈബർ ടവറിൽ ആരംഭിച്ചിട്ടുള്ള കേന്ദ്രത്തിൽ സോഫ്റ്റ്‌വെയർ എഞ്ചിനീയറിങ്ങ് സെൻ്റർ, കോർപ്പറേറ്റ് ഡിജിറ്റൽ സർവീസ്, കസ്റ്റമർ സപ്പോർട്ട് സെൻ്റർ എന്നീ സൗകര്യങ്ങൾ ലഭ്യമാകും. കഴിഞ്ഞ ഏതാനും ദിവസങ്ങൾക്കുള്ളിൽ കേരളത്തിലേക്ക് കടന്നുവരുന്ന നാലാമത്തെ ആഗോള കമ്പനിയാണ് NOV Inc

ലോകത്തിൻ്റെ എല്ലാ കോണുകളിലും നാളെ ഉപയോഗിക്കുന്ന സാങ്കേതിക വിദ്യ ഇവിടെ നിന്ന് ഉൽപാദിപ്പിക്കുന്നതാകുമെന്ന് ഞങ്ങൾ പ്രതീക്ഷിക്കുന്നു എന്നാണ് കമ്പനി അധികൃതർ ഉദ്ഘാടനവേളയിൽ പ്രഖ്യാപിച്ചത്. അവരെല്ലാവരും തന്നെ കേരളത്തിൻ്റെ മികച്ച ടാലൻ്റ് പൂളിനെ പ്രശംസിക്കുകയും ചെയ്തത് എന്തുകൊണ്ട് കേരളം നൂതന സാങ്കേതിക വിദ്യാ വ്യവസായങ്ങളെ ഇവിടേക്ക് ആകർഷിക്കുന്നു എന്നതിനുള്ള ഏറ്റവും അനുയോജ്യമായ തെളിവാണ്. ഒപ്പം മറ്റ് പ്രദേശങ്ങളിൽ നിന്ന് വ്യത്യസ്തമായി ഇവിടെ ലഭ്യമായിട്ടുള്ള ശുദ്ധവായുവും ജലലഭ്യതയും വൈജ്ഞാനിക സമ്പദ്ഘടനാ വികസനവുമെല്ലാം കേരളത്തെ ഇൻ്റസ്ട്രിയൽ റെവല്യൂഷൻ 4.0 കമ്പനികളുടെ ശ്രദ്ധാകേന്ദ്രമായി മാറ്റുകയാണ്.

പാരാലിമ്പിക്‌സിൽ ചരിത്രം കുറിച്ച് ഇന്ത്യയുടെ പ്രീതിപാൽ; 100 മീറ്ററിനു പിന്നാലെ 200 മീറ്ററിലും വെങ്കലം

 

പാരാലിമ്പിക്‌സിൽ വീണ്ടും ചരിത്രം കുറിച്ച് ഇന്ത്യയുടെ പ്രീതിപാലിന് രണ്ടാം മെഡൽ. അത്ലറ്റിക്‌സ് വനിതാ ടി-35 വിഭാഗം 200 മീറ്റർ ഓട്ടത്തിൽ പ്രീതി വെങ്കലം നേടി. നേരത്തേ 100 മീറ്ററിലും ഇന്ത്യൻ താരം വെങ്കലം നേടിയിരുന്നു.

പാരലിമ്പിക്സ് അത്ലറ്റിക്‌സിൽ ഇരട്ടമെഡൽ നേടുന്ന ആദ്യ ഇന്ത്യൻ വനിതയായി ഉത്തർപ്രദേശ് മീററ്റ് സ്വദേശിയായ പ്രീതി. മികച്ച വ്യക്തിഗത സമയം (30.01) കുറിച്ചാണ് പ്രീതി ഫൈനലിൽ മൂന്നാമതെത്തിയത്. ചൈനീസ് താരങ്ങളായ സിയ സോ (28.15), ഗുവ ക്വിയാൻക്വിൻ (29.09) സ്വർണവും വെള്ളിയും നേടി.

സ്വര്‍ഗത്തില്‍ ഭൂമി, അതും തുച്ഛമായ തുകയ്ക്ക്; ഭൂമിയിലെ ഏറ്റവും വലിയ റിയൽ എസ്റ്റേറ്റ് അഴിമതി

 

അടുത്തകാലത്തായി ഇന്‍റര്‍നെറ്റില്‍ ചന്ദ്രനിലും ബഹിരാകാശത്തും സ്ഥലവില്‍പ്പന പൊടിപൊടിക്കുകയാണ്. കേരളത്തിലെ പലരും ഇത്തരത്തില്‍ ചന്ദ്രനില്‍ സ്ഥലം വാങ്ങിയ വാര്‍ത്തകള്‍ നമ്മള്‍ ഇടയ്ക്ക് കേള്‍ക്കാറുമുണ്ട്. ബഹിരാകാശ ടൂറിസവും മനുഷ്യന് ബഹിരാകാശത്ത് താമസിക്കാനുള്ള സാധ്യതകളെ കുറിച്ചുമുള്ള ആലോചനകള്‍ക്ക് പിന്നാലെയാണ് ഇത്തരം സ്ഥല വില്പന വാര്‍ത്തകള്‍ക്ക് പ്രചാരം ലഭിച്ചതും. എന്നാല്‍, മെക്സിക്കോയിലെ ഒരു സഭ ഒരു പടികൂടി കടന്ന് സ്വര്‍ഗത്തില്‍ ഭൂമി വാഗ്ദാനം ചെയ്യുന്നു. അതും വളരെ തുച്ഛമായ തുകയ്ക്ക്. 'ഭൂമിയിലെ ഏറ്റവും വലിയ റിയൽ എസ്റ്റേറ്റ് അഴിമതി' എന്നാണ് സഭയുടെ ഈ നടപടിയെ വിശേഷിപ്പിക്കപ്പെടുന്നത്. 

'ചർച്ച് ഓഫ് ദി എൻഡ് ഓഫ് ടൈംസ്' (the Church of the End of Times)  എന്നറിയപ്പെടുന്ന ഇഗ്ലേഷ്യ ഡെൽ ഫൈനൽ ഡി ലോസ് ടൈംപോസ് എന്ന സഭയാണ് സ്വര്‍ഗത്തില്‍ മനുഷ്യന് ഭൂമി വാഗ്ദാനം ചെയ്യുന്നത്.  2017 -ല്‍ ദൈവവുമായുള്ള തികച്ചും വ്യക്തിപരമായ ഒരു മീറ്റിംഗിൽ സഭയുടെ പാസ്റ്റർക്ക് സ്വര്‍ഗ ഭൂമി മനുഷ്യന് വില്‍ക്കാനുള്ള ദൈവിക അംഗീകാരം ലഭിച്ചുവെന്നാണ് സഭ അവകാശപ്പെടുന്നത്.  

ചതുരശ്ര മീറ്ററിന്  100 ഡോളര്‍ (ഏകദേശം 8,335 രൂപ) കൊടുത്ത് സ്വർഗത്തിൽ മനുഷ്യന് ഭൂമി സുരക്ഷിതമാക്കാമെന്നാണ് സഭയുടെ വാഗ്ദാനം. തീര്‍ന്നില്ല, ദൈവത്തിന്‍റെ കൊട്ടാരത്തിനടുത്തുള്ള പ്രധാന സ്ഥലങ്ങളും സ്വർഗത്തിൽ ഏറ്റവും സുരക്ഷിതവും ഉറപ്പുമുള്ള സ്ഥലവും പാസ്റ്റർ, ഭൂമിയിലെ മനുഷ്യര്‍ക്ക് വാഗ്ദാനം ചെയ്യുന്നു.. 

പണം നോട്ടായിട്ട് തന്നെ നല്‍കണമെന്നില്ല. പകരം പേപാൽ, ഗൂഗിൾ പേ, വിസ, മാസ്റ്റർകാർഡ്, അമേരിക്കൻ എക്സ്പ്രസ്, എന്നിവയ്ക്ക് പുറമെ ഫ്ലെക്സിബിൾ പേയ്‌മെന്‍റ് പ്ലാനുകളും സഭ മുന്നോട്ട് വയ്ക്കുന്നു. സ്ഥല വില്‍പന സാധൂകരിക്കുന്നതിനായി മേഘങ്ങള്‍ക്കിടയിലുള്ള വിശുദ്ധ ഭവനത്തിന്‍റെ ചിത്രങ്ങളും ഓണ്‍ലൈനുകളില്‍ വ്യാപകമായി പ്രചരിക്കുന്നു. ഇത്തരമൊരു വീഡിയോയില്‍ നാലംഗ സന്തുഷ്ട കുടുംബത്തോടൊപ്പം സ്വർണ്ണ കിരണങ്ങളാൽ ചുറ്റപ്പെട്ട ഒരു ആഡംബര മാളികയെ ചിത്രീകരിക്കുന്നു. 2017 മുതല്‍ സ്വര്‍ഗത്തിലെ സ്ഥലവില്പനയിലൂടെ മാത്രം സഭ ദശലക്ഷക്കണക്കിന് ഡോളർ സമ്പാദിച്ചതായി വീഡിയോയില്‍ പരാമര്‍ശിക്കുന്നു. 

തമാശ പരിപാടികൾക്കായി ആരംഭിച്ച ഒരു ഫേസ്ബുക്ക് പേജിലാണ് ഈ വീഡിയോ ആദ്യം പങ്കുവയ്ക്കപ്പെട്ടത്. അവിടെ നിന്നും വീഡിയോ മറ്റ് സമൂഹ മാധ്യമങ്ങളിലേക്ക് വ്യാപകമായി പങ്കുവയ്ക്കപ്പെടുകയായിരുന്നു. വീഡിയോ പങ്കുവച്ച് കൊണ്ട് ഒരു എക്സ് ഉപയോക്താവ് എഴുതിയത് 'എനിക്ക് 100 ബസുകൾ വായ്‌പ തരാൻ ആർക്കാണ് കഴിയുക? എൻ്റെ സ്വർഗീയ വായ്‌പ സുരക്ഷിതമാക്കാൻ ഞാൻ ആഗ്രഹിക്കുന്നു.' 

 'നൈജീരിയക്ക് ഭ്രാന്താണെന്ന് ഞാൻ കരുതി, മെക്‌സിക്കോ അതിനെ മറ്റൊരു തലത്തിലേക്ക് കൊണ്ടുപോയി.' എന്നായിരുന്നു മറ്റൊരു കുറിപ്പ്. 'നൂറ്റാണ്ടിന്റെ തമാശ' എന്നായിരുന്നു മറ്റൊരു കുറിപ്പ്. 'ഇത് ഏറ്റവും വലിയ റിയൽ എസ്റ്റേറ്റ് അഴിമതിയായിരിക്കും,' എന്നായിരുന്നു മറ്റൊരു കാഴ്‌ചക്കാരൻ എഴുതിയത്. അതേസമയം 'ഡൌൺപേമെന്റിനെ കുറിച്ച് അന്വേഷിച്ചവരും കുറവല്ല. 'അവർ മെറ്റാവേഴ്‌സസ് നിർമ്മിക്കുകയാണ്' എന്നായിരുന്നു ഒരു കുറിപ്പ്. 'ഇത്തരം വ്യാജ ദൈവ മനുഷ്യർ അവരുടെ നുണകൾ എങ്ങനെ ഇങ്ങനെ വിജയകരമായി വിൽക്കുന്നത്.' എന്നായിരുന്നു ഒരു കാഴ്ച‌ക്കാരന്റെ സംശയം.

ആശയറ്റ ഭാവിയിലേക്കുള്ള മനുഷ്യരാശിയുടെ യാത്ര; നിർമിത ബുദ്ധി ഉപയോഗിച്ച് പ്രവർത്തിക്കുന്ന ആയുധങ്ങൾ നിരോധിക്കണം - ഫ്രാൻസിസ് മാർപാപ്പ

 

നിർമിത ബുദ്ധി ഉപയോഗിച്ച് പ്രവർത്തിക്കുന്ന ആയുധങ്ങൾ നിരോധിക്കണമെന്ന് ജി7 ഉച്ചകോടിയിൽ ഫ്രാൻസിസ് മാർപാപ്പ ആവശ്യപ്പെട്ടു. സായുധ പോരാട്ടങ്ങൾ ദുരന്തമാകുന്നതിന്റെ വെളിച്ചത്തിൽ നിർമിതബുദ്ധി നിയന്ത്രിക്കുന്ന ആയുധങ്ങൾ വികസിപ്പിക്കുന്നതും ഉപയോഗിക്കുന്നതും സംബന്ധിച്ച് പുനർവിചിന്തനം നടത്തേണ്ട സമയം അതിക്രമിച്ചെന്നും അവ പൂർണമായും നിരോധിക്കണമെന്നും മാർപാപ്പ ആവശ്യപ്പെട്ടു.

"മനുഷ്യജീവനെടുക്കാൻ ഒരിക്കലും ഒരു യന്ത്രത്തെ നിയോഗിക്കരുത്. നിർമിത ബുദ്ധി ഒരേസമയം ആവേശവും ഭീഷണിയും ഉയർത്തുന്ന സംഗതിയാണ്. സ്വന്തം ജീവിതത്തെക്കുറിച്ച് തീരുമാനങ്ങളെടുക്കാനുള്ള കഴിവ് മനുഷ്യരിൽനിന്ന് എടുത്തുമാറ്റി പകരം യന്ത്രങ്ങളെ ആശ്രയിക്കുന്നത് ആശയറ്റ ഭാവിയിലേക്കുള്ള മനുഷ്യരാശിയുടെ യാത്രയാകും. അതിനാൽ ഈ നീക്കത്തെ നാം അപലപിക്കണം.'- മാർപാപ്പ ചൂണ്ടിക്കാട്ടി.

നിർമിത ബുദ്ധി ഉപയോഗത്തിൻ്റെ നൈതികതയെക്കുറിച്ചുള്ള ചർച്ചയിലാണ് ഫ്രാൻസിസ് മാർപാപ്പ ഭാഗമായത്. ഇതാദ്യമായാണ് ഒരു മാർപാപ്പ ജി7 ഉച്ചകോടിയുടെ ചർച്ചയിൽ പങ്കെടുക്കുന്നതും നിലപാട് വ്യക്തമാക്കുന്നതും.

ലോക കേരള സഭയിലെ പ്രത്യേക ക്ഷണിതാവായി സന്ദീപ് കൊക്കൂൺ

 

ലോക കേരള സഭയിലെ പ്രത്യേക ക്ഷണിതാവായി സന്ദീപ് കൊക്കൂൺ പങ്കെടുക്കും. ബാംഗ്ലൂരിലെ പ്രമുഖ ടെക്സ്റ്റൈയിൽ വ്യവസായിയാണ് സന്ദീപ് കൊക്കൂൺ. വസ്ത്ര നിർമ്മാണ മേഖലയിലെ പ്രശസ്‌ത സ്ഥാപനമായ കോക്കൂൺ അപ്പാരൽസിന്റെ ഡയറക്‌ടറായ സന്ദീപ് SCOTWILSON, WARRIOR, MAURYA VASTRA തുടങ്ങിയ ബ്രാൻ്റുകളുടെ നിർമ്മാതാവ് കൂടിയാണ്. വസ്ത്ര വ്യാപാര രംഗത്ത് യുവാക്കൾക്കിഷ്ടപ്പെട്ട പുതിയ ടെൻ്റ്രുകൾ കൊണ്ടുവരുന്ന   മികച്ചൊരു ടെക്സ്റ്റയിൽ വ്യവസായിയുമാണ് ഇദ്ദേഹം. സന്ദീപ് കൊക്കൂൺ പാലക്കാട്‌ മണ്ണാർക്കാട് സ്വാദേശിയാണ്.ഇന്ത്യയിലെ സിൽക്ക്   വസ്ത്ര നിർമ്മാണ  രംഗത്തും ശുദ്ധ (Pure) സിൽക്ക് എക്സ്പോർട്ടിങ് രംഗത്തും, വിവാഹ വസ്ത്ര വിപണിയിലും ഒഴിച്ചുകൂടാനാവാത്ത ഒരു പേരാണ് കോക്കൂൺ അപ്പാരൽസ്.

കുവൈത്ത് ദുരന്തത്തിൻ്റെ പശ്ചാത്തലത്തിൽ ഉദ്ഘാടന ചടങ്ങും ആഘോഷവുമെല്ലാം ഇല്ലാതെയാണ് ഇത്തവണ ലോക കേരള സഭ നടക്കുക. 14, 15 തീയ്യതികളിൽ നിശ്ചയിച്ച പ്രകാരം മറ്റു പരിപാടികൾ നടക്കും.

103 രാജ്യങ്ങളിലെ പ്രതിനിധികളാണ് ഇത്തവണ ലോക കേരള സഭയിൽ പങ്കെടുക്കുന്നത്. 14ന് വെള്ളിയാഴ്‌ച രണ്ട് മുതൽ മൂന്നര വരെ എട്ട് വിഷയങ്ങളിൽ ചർച്ച നടക്കും. ശനിയാഴ്‌ച രാവിലെ മുതലാണ് മേഖലാ യോഗവും റിപ്പോർട്ടിംഗും. തുടർന്ന് എട്ട് വിഷയത്തിലെ ചർച്ചകളുടെ റിപ്പോർട്ട് സമർപ്പണം. വൈകീട്ട് മുഖ്യമന്ത്രി മറുപടി പറയും.

കുവൈത്തിലെ തീപിടിത്തത്തില്‍ മരിച്ചവരിൽ 21 ഇന്ത്യക്കാര്‍, 11 മലയാളികൾ; കൂടുതൽ വിവരങ്ങൾ പുറത്ത്

കുവൈത്തില്‍ തൊഴിലാളികളുടെ ക്യാമ്പിലുണ്ടായ തീപിടിത്തത്തില്‍ മരിച്ചവരിൽ 21 ഇന്ത്യക്കാര്‍. 11 പേർ മലയാളികളാണ്. ഇതില്‍ ഒരാള്‍ കൊല്ലം സ്വദേശിയാണ്. കൊല്ലം പൂയപ്പള്ളി പയ്യക്കോട് സ്വദേശി ഷമീർ ആണ് മരിച്ചത്. നിലവിൽ കൊല്ലം-ആലപ്പുഴ ജില്ലാ അതിർത്തിയിൽ വയ്യാങ്കരയിലാണ് താമസം. 46 ഇന്ത്യക്കാരാണ് ചികിത്സയിലുള്ളത്.

മരിച്ച 40 പേരിൽ 21 പേരുടെ വിവരങ്ങൾ ലഭ്യമായി. ഷിബു വർഗീസ്, തോമസ് ജോസഫ്, പ്രവീൺ മാധവ് സിംഗ്, ഷമീർ, ലൂക്കോസ് വടക്കോട്ട് ഉണ്ണുണ്ണി, ഭുനാഫ് റിച്ചാർഡ് റോയ് ആനന്ദ, കേളു പൊന്മലേരി, സ്റ്റെഫിൻ എബ്രഹാം സാബു, അനിൽ ഗിരി, മുഹമ്മദ് ഷെരീഫ് ഷെരീഫ, സാജു വർഗീസ്, ദ്വാരികേഷ് പട്ടനായക്, മുരളീധരൻ പി.വി , വിശ്വാസ് കൃഷ്ണൻ, അരുൺ ബാബു, സാജൻ ജോർജ്,  രഞ്ജിത്ത് കുണ്ടടുക്കം, റെയ്മണ്ട് മഗ്പന്തയ് ഗഹോൽ, ജീസസ് ഒലിവറോസ് ലോപ്സ്, ആകാശ് ശശിധരൻ നായർ, ഡെന്നി ബേബി കരുണാകരൻ എന്നിവരാണ് മരിച്ചത്. 

തീപിടിത്തമുണ്ടായത് മലയാളിയുടെ ഉടമസ്ഥതയിലുള്ള കമ്പനിയിലെ ജീവനക്കാർ താമസിച്ച ഫ്ലാറ്റിലാണ്. മാംഗെഫിൽ എൻബിടിസി കമ്പനിയുടെ നാലാം നമ്പർ ക്യാംപിലാണ് അഗ്നിബാധയുണ്ടായത്. പുലർച്ചെ നാലിനാണ് തീപിടിത്തമുണ്ടായത്.  മുഴുവൻ പേരും ഉറക്കത്തിലായിരുന്നപ്പോഴാണ് തീ പടര്‍ന്നു പിടിച്ചത്. 20 ഗ്യാസ് സിലിണ്ടറുകൾ പൊട്ടിത്തെറിച്ചത് അപകടത്തിന്റെ വ്യാപ്തി കൂട്ടി. രക്ഷപ്പെടാൻ ഉള്ള വ്യഗ്രതയിൽ തിക്കും തിരക്കും ഉണ്ടായി. രക്ഷപ്പെടാനായി കെട്ടിടത്തിനു പുറത്തേക്ക് ചാടി നട്ടെല്ലിന് പരിക്ക് പറ്റിയ നിരവധി പേർ ചികിത്സയിലാണ്. അഞ്ച് ഫയർ ഫോഴ്‌സ് ഉദ്യോഗസ്ഥർക്കും പരിക്കേറ്റു.

അൽ അദാൻ ആശുപത്രിയിൽ 30 ഇന്ത്യക്കാർ ചികിത്സയിലുണ്ട്. അൽ കബീർ ആശുപത്രിയിൽ ചികിത്സയിലുള്ളത് 11 പേരാണ്. 10 പേരെ ഇന്ന് ഡിസ്ചാർജ് ചെയ്യും. ഫർവാനിയ ആശുപത്രിയിൽ 6 പേർ ചികിത്സയിലുണ്ട്. 4 പേരെ ഡിസ്ചാർജ് ചെയ്‌തു.  പരിക്ക് പറ്റി ചികിത്സയിൽ ഉള്ളവർ മിക്കവരും ഇന്ത്യക്കാരാണ്. മുഴുവൻ സഹായവും നൽകുമെന്ന് അംബാസഡര്‍ അറിയിച്ചു. 

ഹെലികോപ്റ്ററിന് അരികിൽ രക്ഷാപ്രവർത്തകർ; ഇറാൻ പ്രസിഡൻ്റ് ഇബ്രാഹിം റെയ്‌സിയെ ഇതുവരെ കണ്ടെത്താൻ സാധിച്ചില്ല

 

ഹെലികോപ്റ്റർ അപകടത്തിൽപെട്ട ഇറാൻ പ്രസിഡൻ്റ് ഇബ്രാഹിം റെയ്‌സിയെ ഇതുവരെ കണ്ടെത്താൻ സാധിച്ചിട്ടില്ലെന്ന് റിപ്പോർട്ട്. തകർന്ന ഹെലികോപ്റ്ററിന് അരികിൽ രക്ഷാപ്രവർത്തകരെത്തി. എന്നാൽ, അപകടത്തിൽ ജീവനോടെ ആരും രക്ഷപ്പെട്ടതിൻ്റെ സൂചനകളൊന്നും സ്ഥലത്ത് നിന്നും ലഭിച്ചിട്ടില്ലെന്ന് അന്താരാഷ്ട്ര വാർത്താ ഏജൻസികൾ റിപ്പോർട്ട് ചെയ്‌തു. 

തകർന്ന ഹെലികോപ്റ്ററും രക്ഷാപ്രവർത്തകർ കണ്ടെത്തിയെങ്കിലും ഇതിന് സമീപത്തായി ആരെയും ഇതുവരെ കണ്ടെത്താനായിട്ടില്ല. ഹെലികോപ്റ്ററിലുണ്ടായിരുന്ന ഇറാൻ പ്രസിഡന്റും വിദേശകാര്യ മന്ത്രിയും മരിച്ചെന്ന സൂചനകളാണ് വാർത്താ ഏജൻസികൾ പുറത്തുവിടുന്നതെങ്കിലും ഇക്കാര്യത്തിൽ ഔദ്യോഗിക സ്ഥിരീകരണം ഇതുവരെയുണ്ടായിട്ടില്ല.

രക്ഷാദൗത്യത്തിന് റഷ്യയുടെയും തുർക്കിയുടെയും സഹായം ലഭിച്ചിട്ടുണ്ട്. രക്ഷാപ്രവർത്തനത്തിനായി പ്രത്യേക പരിശീലനം ലഭിച്ച സംഘത്തെ അയച്ചതായി റഷ്യ വ്യക്തമാക്കിയിരുന്നു. 14 മണിക്കൂറായി നാൽപതിലേറെ സംഘങ്ങൾ തെരച്ചിൽ തുടരുകയാണ്. ഹെലികോപ്റ്റർ അപകടത്തിൽപ്പെട്ട സംഭവത്തിൽ അപകടസ്ഥലം കണ്ടെത്തിയെന്നും ഉസി ഗ്രാമത്തിനടത്താണ് ഹെലികോപ്റ്റർ ഇറക്കിയെന്നും വാർത്താ ഏജൻസി നേരത്തെ റിപ്പോർട്ട് ചെയ്‌തിരുന്നു. മോശം കാലാവസ്ഥാ രക്ഷാദൗത്യത്തിന് തടസമാവുകയാണെന്നും റിപ്പോർട്ട് പറയുന്നു. അപകടസമയം പ്രസിഡന്റും ഇറാൻ വിദേശകാര്യ മന്ത്രിയും ഹെലികോപ്റ്ററിൽ ഉണ്ടായിരുന്നുവെന്നാണ് വാർത്താ ഏജൻസി സ്ഥിരീകരിച്ചിരുന്നു.

അസർബൈജാൻ അതിർത്തിക്ക് സമീപം ജോൽഫ നഗരത്തിലാണ് അപകടമുണ്ടായത് എന്നായിരുന്നു വിവരം. ടെഹ്റാനിൽ നിന്ന് 600 കിലോ മീറ്റർ അകലെയാണ് ഈ സ്ഥലം. മോശം കാലാവസ്ഥയെ തുടർന്ന് ഹെലികോപ്റ്റർ തിരിച്ചിറക്കിയതാണെന്നാണ് ഇറാൻ വാർത്താ ഏജൻസി വിശദീകരിക്കുന്നത്. 

പ്രസിഡൻ്റ് ഇബ്രാഹിം റെയ്സി, വിദേശകാര്യ മന്ത്രി ഹുസൈൻ അമിർ, ഈസ്റ്റേൺ അസർബൈജാൻ ഗവർണർ മലേക് റഹ്മതി, തബ്റിസ് ഇമാം മുഹമ്മദ് അലി അലെഹസം, പൈലറ്റ്, സഹപൈലറ്റ്, ക്രൂ ചീഫ്, സുരക്ഷാ മേധാവി, ബോഡി ഗാർഡ് എന്നിവരാണ് ഹെലികോപ്ടറിലുണ്ടായിരുന്നത്.

യുഎൻ ഉദ്യോഗസ്‌ഥനായ ഇന്ത്യൻ പൗരൻ ഗാസയിൽ കൊല്ലപ്പെട്ടു

ഐക്യരാഷ്ട്ര സംഘടന ഉദ്യോഗസ്‌ഥനായ ഇന്ത്യൻ പൗരൻ ഗാസയിൽ കൊല്ലപ്പെട്ടു. റാഫയിൽ ഇദ്ദേഹം സഞ്ചരിച്ച വാഹനത്തിനു നേരെയുണ്ടായ ആക്രമണത്തിലാണ് മരണം സംഭവിച്ചത്.

ഇസ്രയേൽ - ഹമാസ് യുദ്ധം ആരംഭിച്ചതിനു ശേഷം ആദ്യമായാണ് മറ്റൊരു രാജ്യത്തെ യുഎൻ ഉദ്യോഗസ്ഥൻ കൊല്ലപ്പെടുന്നത്.

ഇന്ത്യൻ സൈന്യം നൽകിയ വിമാനങ്ങൾ പ്രവർത്തിപ്പിക്കാൻ കഴിവുള്ള പൈലറ്റുമാരില്ല; തുറന്ന് പറഞ്ഞ് മാലദ്വീപ് പ്രതിരോധ മന്ത്രി.

ഇന്ത്യ നൽകിയ മൂന്ന് യുദ്ധ വിമാനങ്ങൾ പറത്താൻ കഴിയുന്ന പൈലറ്റുമാർ മാലദ്വീപ് സൈന്യത്തിൽ ഇല്ലെന്ന് പ്രതിരോധ മന്ത്രി ഗസ്സാൻ മൗമൂൻ. 

ഒരു മാധ്യമ പ്രവർത്തകന്റെ ചോദ്യത്തിന് ഉത്തരമായാണ് ഇന്ത്യ നൽകിയ രണ്ടു ഹെലികോപ്റ്ററുകളും ഒരു  ഡോർണിയർ വിമാനവും പറത്താൻ കഴിവുള്ള ആരും  മാലദ്വീപ് ദേശീയ പ്രതിരോധ സേനയിൽ ഇല്ലെന്ന് മന്ത്രി തുറന്നുപറഞ്ഞത്. 76 ഇന്ത്യൻ പ്രതിരോധ ഉദ്യോഗസ്ഥർ ദ്വീപ് രാജ്യം വിട്ടതിന് പിന്നാലെയാണ് വെളിപ്പെടുത്തൽ. ഇന്ത്യ സംഭാവന ചെയ്ത മൂന്ന് വിമാനങ്ങൾ പ്രവർത്തിപ്പിക്കാൻ ശേഷിയുള്ള പൈലറ്റുമാർ മാലിദ്വീപ് സൈന്യത്തിൽ ഇപ്പോഴുമില്ലെന്ന് മന്ത്രി വ്യക്തമാക്കി.

വിവിധ കാരണങ്ങളാൽ നമ്മുടെ സൈനികരുടെ പരിശീലനം പൂർത്തിയായിട്ടില്ല. രണ്ട് ഹെലികോപ്റ്ററുകളും ഡോർണിയറും പറത്താൻ ലൈസൻസുള്ളവരോ പൂർണ്ണമായും പ്രവർത്തനക്ഷമമോ ആയ ആരും ഇപ്പോൾ ഞങ്ങളുടെ സേനയിൽ ഇല്ലെന്നും അദ്ദേഹം വ്യക്തമാക്കി. ചൈന അനുകൂലിയായ മുഹമ്മദ് മുയിസു അധികാരത്തിലേറിയതോടെയാണ് ഇന്ത്യയും മാലദ്വീപും തമ്മിലുള്ള ബന്ധത്തിൽ വിള്ളലുകൾ വീണത്. ദ്വീപ് രാഷ്ട്രത്തിലെ എല്ലാ ഇന്ത്യൻ സൈനികരെയും മെയ് 10 നകം പിൻവലിക്കണമെന്ന് പ്രസിഡന്റ് മുഹമ്മദ് മുയിസു ആവശ്യപ്പെട്ടിരുന്നു. തുടർന്ന് ഇന്ത്യ സൈനികരെ പിൻവലിച്ചു.

മുൻ പ്രസിഡന്റുമാരായ മുഹമ്മദ് നഷീദ്, അബ്ദുല്ല യമീൻ എന്നിവരുടെ കാലഘട്ടത്തിലാണ് ഇന്ത്യ മാലദ്വീപിന് ഹെലികോപ്റ്ററുകൾ നൽകുന്നത്. മുൻ പ്രസിഡന്റ് ഇബ്രാഹിം മുഹമ്മദ് സോലിഹിന്റെ കാലത്താണ് ഡോർണിയർ യുദ്ധവിമാനം മാലദ്വീപിന് നൽകുന്നത്.

ഓരോ എട്ടര വര്‍ഷത്തിലും ഭൂമിക്ക് അക്കാര്യം സംഭവിക്കും, സൂര്യനില്‍ നിന്ന് രക്ഷിക്കുന്നത് ഇങ്ങനെ

ഭൂമിക്ക് എന്തെല്ലാം പ്രത്യേകതകള്‍ ഉണ്ട്. ഇത് ഒരുപാട് കാലമായി ശാസ്ത്രജ്ഞര്‍ അന്വേഷിച്ച് കൊണ്ടിരിക്കുന്നതാണ്. ഇപ്പോഴിതാ നിര്‍ണായകമായ കാര്യങ്ങളാണ് കണ്ടെത്തിയിരിക്കുന്നത്. ഭൂമിയുടെ അകകാമ്പിനെ കുറിച്ചുള്ളതാണ് വിവരം. ഇത് ഭൂമി തുരന്ന് അഗാധത്തിലേക്ക് പോയാലാണ് ഇന്നര്‍ കോര്‍ എന്ന ഭാഗത്തേക്ക് എത്താനാവുക. അതിശക്തമായ ഗുരുത്വാകര്‍ഷണമാണ് ഇവിടെയുള്ളത്.

ഭൂമിയുടെ അച്ചുതണ്ടിലെ കറക്കമെല്ലാം ഇതിന്റെ നിയന്ത്രണത്തിലാണ്. ഒരു ഇരുമ്പ് പന്ത് പോലെയാണ് അകകാമ്പ് ഉണ്ടാവുക. ഇവ കറങ്ങി കൊണ്ടിരിക്കുക മാത്രമല്ല, മറിച്ച് ചാഞ്ചാടി കൊണ്ടിരിക്കുകയാണ്. പ്ലൂട്ടോ ഗ്രഹത്തേക്കാള്‍ വലിപ്പമേറിയതാണ് ഈ ഇരുമ്പ് പന്ത്. ഒരു ദശാബ്ദത്തോളമായി ഈ പ്രക്രിയ തുടരുന്നുവെന്ന് ശാസ്ത്രജ്ഞര്‍ പറയുന്നു. ഇവിടെ അധികം സാന്ദ്രതയേറിയതാണെന്ന് പൊതുവേ കരുതപ്പെടാറുണ്ട്.എന്നാല്‍ അത് സത്യമല്ല.

ഭൂമിയുടെ പുറംതോടിനേക്കാള്‍ നാലോ അഞ്ചോ തവണ സാന്ദ്രതയേറിയതാണ് ഈ മേഖല. ഇവിടെ അതിശക്തമായ താപനിലയാണ് ഉള്ളത്. അത് പദാര്‍ത്ഥികളെ മിശ്ര ദ്രാവകരൂപത്തിലാക്കുന്നു. ഇവയെ നിയന്ത്രിച്ച് നിര്‍ത്തുന്നത് ഭൂമിയുടെ ഹൃദയ ഭാഗത്തുള്ള ശക്തമായ സമ്മര്‍ദമാണ്. ഭൂമിയുടെ കാമ്പ് കൂടുതല്‍ തണുക്കുകയും, വളരുകയും, ഭ്രമണം ചെയ്യുമ്പോഴും അത് താപത്തെ പുറത്തേക്ക് വീടും. ഇവ ജല പദാര്‍ഥങ്ങളെ ഭൂമിയുടെ പുറം തോടിലേക്ക് പ്രവഹിക്കാന്‍ സഹായിക്കും.

അതേസമയം പുറംതോടിലേക്ക് പ്രവര്‍ത്തിക്കുന്ന ജലപദാര്‍ത്ഥമാണ് ഡൈനാമോ ഉണ്ടാക്കുന്നത്. ഇവ മെക്കാനിക്കല്‍ എനര്‍ജിയെ വൈദ്യുത ഊര്‍ജമാക്കി മാറ്റും. ഇതുവഴിയാണ് ഭൂമിക്ക് കാന്തിക തരംഗങ്ങള്‍ ഉണ്ടാവുന്നത്. അതിശക്തമായ സൂര്യാഘാതങ്ങളെ ഭൂമിക്ക് താങ്ങാനാവുന്നത് ഈ കാന്തിക തരംഗങ്ങള്‍ ഉള്ളത് കൊണ്ടാണ്. അതായത് ഈ ഭൂമിയുടെ അകകാമ്പിലെ ചെറിയ മാറ്റം പോലും തിരിച്ചറിയേണ്ടതുണ്ട്. കാരണം ചെറിയ മാറ്റം പോലും വലിയ പ്രത്യാഘാതങ്ങളുണ്ടാക്കും. ഒരു ദിനത്തില്‍ കാര്യമായ മാറ്റങ്ങള്‍ പോലും ഇതുണ്ടാക്കും. ദിവസത്തിന്റെ ദൈര്‍ഘ്യത്തില്‍ വര്‍ധന തന്നെ ഇതിലൂടെയുണ്ടാവും. ഓരോ ആറ് വര്‍ഷം കൂടുമ്പോഴും ഈ ചലനത്തിന്റെ ഗതി മാറുന്നതായിട്ടാണ് ശാസ്ത്രജ്ഞര്‍ കണ്ടെത്തിയിരിക്കുന്നത്.

ഭൂമിയുടെ ധ്രുവങ്ങളിലേക്ക് വെളിച്ചം വീശുന്നതാണ് പുതിയ കണ്ടെത്തലുകള്‍. ഭൂമിയുടെ അകകാമ്പിലെ ഇത്തരം പ്രത്യേകതകളെ കുറിച്ച് നേരത്തെ പല വിവരങ്ങളും പുറത്തുവന്നിരുന്നു. ഓരോ 8.7 വര്‍ഷം കൂടുമ്പോഴും ഭൂമിയുടെ ചലനത്തില്‍ ഒരു താളം കടന്നുവരുമെന്നാണ് കണ്ടെത്തല്‍. ഈ അകകാമ്പ് ഒരു വശത്തേക്ക് ചെരിഞ്ഞ് ഇരിക്കുകയാണ്. ഇവ അച്ചുതണ്ടില്‍ നിന്ന് സ്ഥാനം തെറ്റിയാണ് നില്‍ക്കുന്നത്. ഇത്തരത്തില്‍ സ്ഥാനം തെറ്റി ചലനം തുടരുന്നുണ്ടെന്നും കണ്ടെത്തലിലുണ്ട്. സാന്ദ്രതാ മാറ്റം അകകാമ്പിന്റെ അതിര്‍ത്തി വരമ്പുകളില്‍ ഉണ്ടായിട്ടുണ്ട്. ഇവ ഭൂമിയുടെ പുറംതോടിനെ ചലനത്തെ സ്വാധീനിക്കാമെന്നാണ് വിലയിരുത്തല്‍.

യുഎഇ തുണച്ചു; വന്‍ നേട്ടം കൊയ്ത് ഇന്ത്യ... പ്രവാസി പണം ഒഴുകുന്നു... ലോകബാങ്ക് റിപ്പോര്‍ട്ട്

പ്രവാസികള്‍ ഇന്ത്യയിലേക്ക് അയക്കുന്ന പണത്തിന്റെ തോത് ഓരോ വര്‍ഷവും ഉയരുന്നു. ഈ വര്‍ഷം 12500 കോടി ഡോളറാണ് ഇന്ത്യയിലെത്തുമെന്ന് പ്രതീക്ഷിക്കുന്നത്. കഴിഞ്ഞ വര്‍ഷത്തേക്കാള്‍ മൂന്ന് ശതമാനം കൂടുതലാണിത്. ലോകത്ത് ഏറ്റവും കൂടുതല്‍ പ്രവാസി പണം വരുന്ന രാജ്യം ഇന്ത്യയാണ്. ചൈന ഉള്‍പ്പെടെയുള്ള മറ്റു രാജ്യങ്ങള്‍ ഇന്ത്യയേക്കാള്‍ വളരെ പിന്നിലാണ്.

കഴിഞ്ഞ വര്‍ഷവുമായി താരതമ്യം ചെയ്യുമ്പോള്‍ 1400 കോടി ഡോളറിന്റെ വര്‍ധനവാണ് ഈ വര്‍ഷം എന്ന് ലോകബാങ്ക് റിപ്പോര്‍ട്ടില്‍ പറയുന്നു. ഇന്ത്യ വലിയ ലാഭമാണ് ഇക്കാര്യത്തില്‍ കൊയ്യുന്നതെന്ന് ലോകബാങ്ക് റിപ്പോര്‍ട്ടിലെ കണക്കുകള്‍ വ്യക്തമാക്കുന്നു. ഏതൊക്കെ രാജ്യങ്ങളില്‍ നിന്നാണ് ഇന്ത്യയിലേക്ക് കൂടുതല്‍ പണം വരുന്നത്, എന്താണ് ഇന്ത്യ ഒന്നാം സ്ഥാനം നിലനിര്‍ത്താന്‍ കാരണം എന്നീ കാര്യങ്ങളും റിപ്പോര്‍ട്ടിലുണ്ട്.

125 ബില്യണ്‍ ഡോളര്‍ ഇന്ത്യയിലേക്ക് വരുമ്പോള്‍ രണ്ടാം സ്ഥാനത്തുള്ള മെക്‌സിക്കോയിലേക്ക് എത്തുന്ന പ്രവാസി പണം 67 ബില്യണ്‍ ഡോളറാണ്. മൂന്നാം സ്ഥാനത്തുള്ള ചൈനയിലേക്ക് 50 ബില്യണ്‍ ഡോളറാണ് എത്തിയത്. 40 ബില്യണ്‍ ഡോളറുമായി ഫിലിപ്പീന്‍സ് നാലാം സ്ഥാനത്തും 24 ബില്യണ്‍ ഡോളറുമായി ഈജിപ്ത് അഞ്ചാം സ്ഥാനത്തുമുണ്ട്.

അമേരിക്ക, ബ്രിട്ടന്‍, സിംഗപ്പൂര്‍ എന്നീ രാജ്യങ്ങളില്‍ നിന്നാണ് ഇന്ത്യയിലേക്ക് കൂടുതല്‍ പ്രവാസി പണം എത്തിയത്. ഇന്ത്യയിലേക്ക് വന്ന പണത്തിന്റെ 36 ശതമാനവും ഈ മൂന്ന് രാജ്യങ്ങളില്‍ നിന്നാണ്. യുഎഇ, സൗദി അറേബ്യ, ഖത്തര്‍ ഉള്‍പ്പെടയുള്ള ജിസിസി രാജ്യങ്ങളില്‍ നിന്നാണ് പിന്നീട് കൂടുതല്‍ പ്രവാസി പണം വരുന്നത്. 18 ശതമാനം വരും ആറ് ജിസിസി രാജ്യങ്ങളില്‍ നിന്ന് വരുന്ന പ്രവാസി പണം എന്ന് ലോകബാങ്ക് റിപ്പോര്‍ട്ടില്‍ പറയുന്നു. വിദേശത്ത് നിന്ന് കൂടുതല്‍ പണം വരാന്‍ സഹായകമായത് ഇന്ത്യയും യുഎഇയും കഴിഞ്ഞ ഫെബ്രുവരിയില്‍ ഒപ്പുവച്ച കരാറാണ്. പ്രാദേശിക കറന്‍സികളില്‍ ഇടപാട് നടത്താന്‍ അനുമതി നല്‍കുന്നതായിരുന്നു കരാര്‍. പേയ്‌മെന്റ് സംവിധാനങ്ങള്‍ ബന്ധിപ്പിച്ചതും നേട്ടമായി. രൂപയിലും ദിര്‍ഹത്തിലും ഇടപാട് നടത്താന്‍ സാധിക്കുന്ന വിധമാണ് കരാര്‍ ഒപ്പുവച്ചിരിക്കുന്നത്.

ദിര്‍ഹം-രൂപ ഇടപാടുകള്‍ എളുപ്പമാക്കുന്ന കരാറോടെ ഔദ്യോഗിക ചാനല്‍ വഴി ഇടപാടുകള്‍ വര്‍ധിച്ചു. അനൗദ്യോഗിക ഇടപാടുകള്‍ കുറയുകയും ചെയ്തു. അതേസമയം, 2023 പോലെയാകില്ല 2024 എന്ന പ്രവചനങ്ങളുണ്ട്. വരുന്ന വര്‍ഷം ആഗോളതലത്തില്‍ പണപ്പെരുപ്പം വര്‍ധിക്കാനുള്ള സാധ്യതയുണ്ട് എന്ന് പറയപ്പെടുന്നു. മാത്രമല്ല, വളര്‍ച്ചാ നിരക്ക് കുറയുമെന്നും കരുതുന്നു. ഇത് പ്രവാസി പണത്തിന്റെ വരവിനെ ബാധിച്ചേക്കുമെന്നും ലോകബാങ്ക് റിപ്പോര്‍ട്ടില്‍ സൂചിപ്പിക്കുന്നു.

കാനഡയില്‍ നിന്ന് വീണ്ടുമൊരു സന്തോഷ വാർത്ത: പ്രതിസന്ധി ബാധിച്ചില്ല, 90% ഇന്ത്യക്കാർക്കും വിസ

ഇന്ത്യയും കാനഡയും തമ്മിലുള്ള നയതന്ത്ര സംഘർഷ വാർത്തകള്‍ക്കിടയിലും വിദ്യാർത്ഥികൾക്ക് ആശ്വാസമായി ചില വാർത്തകള്‍. നയതന്ത്ര പ്രശ്നങ്ങള്‍ ഇന്ത്യന്‍ വിദ്യാർത്ഥികള്‍ക്ക് പഠന വിസ അനുവദിക്കുന്നതില്‍ യാതൊരു തടസ്സവും ഉണ്ടാക്കിയിട്ടില്ലെന്നാണ് റിപ്പോർട്ടുകള്‍ വ്യക്തമാക്കുന്നത്. അതായത് കാനഡയിൽ പഠിക്കാൻ ആഗ്രഹിക്കുന്ന ഉദ്യോഗാർത്ഥികൾക്ക് യോഗ്യതകള്‍ ഉണ്ടെങ്കില്‍ വിസ ലഭിക്കാനുള്ള ഉയർന്ന സാധ്യത ഇപ്പോഴും നിലനില്‍ക്കുന്നു.

ഇന്ത്യയില്‍ നിന്നും അപേക്ഷിക്കുന്ന 85% മുതൽ 95% വരെ ആളുകള്‍ക്കും കാനഡ വിസ അനുവദിക്കുന്നത് തുടരുന്നുണ്ട്. ഗുരുതരമായ പ്രശ്നങ്ങളോ മതിയായ യോഗ്യതയോ ഇല്ലാത്ത ചെറിയ ശതമാനം ആളുകളുടെ അപേക്ഷകള്‍ മാത്രമാണ് തള്ളപ്പെടുന്നത്. ഇന്ത്യയുമായുള്ള തർക്കങ്ങള്‍ ബാധിക്കാതെ കാനഡയുടെ ഇമിഗ്രേഷൻ നയങ്ങൾ അതേപടി ഇപ്പോഴും നിലനില്‍ക്കുന്നു. നിലവിലെ ഈ സാഹചര്യത്തില്‍ വിദ്യാർത്ഥികള്‍ ആശങ്കപ്പെടേണ്ടതായിട്ട് ഒന്നുമില്ലെന്ന് വ്യക്തം.

ഐഇഎല്‍ടിഎസില്‍ ബാന്‍ഡ് 6 സ്‌കോർ ഉള്ള വിദ്യാർത്ഥികൾക്ക് പോലും പഠന വിസ ലഭിക്കുന്നുണ്ട്. PTE (Pearson test of English) പരീക്ഷയിൽ പോലും, 60 സ്കോറാണ് മാനദണ്ഡം. എന്നാല്‍ 57, 58, 59 സ്കോറുകൾ ഉള്ള അപേക്ഷകർക്കും കാനഡ വിസ നല്‍കുന്നുണ്ട്. ഇന്ത്യയും കാനഡയും തമ്മിലുള്ള തർക്കം ഉയർന്നുവന്നതിന് ശേഷവും വിദ്യാർത്ഥികളുടെ വിസ അനുവദിക്കുന്ന നിരക്ക് 90 മുതൽ 95% വരെയാണെന്നാണ് പഞ്ചാബിലെ ഐഇഎൽടിഎസ്, പിടിഇ പരിശീലന സ്ഥാപനങ്ങളുടെ പ്രധാന കേന്ദ്രമായ ദോബ മേഖലയിലുള്ളവർ വ്യക്തമാക്കുന്നു.

കഴിഞ്ഞ ഒരു മാസത്തിനിടെ തങ്ങള്‍ വഴിയുള്ള വിസ അനുവദിക്കുന്ന നിരക്കിൽ 18-19% വളർച്ച ഉണ്ടായതായി ചില കേന്ദ്രങ്ങൾ കൂട്ടിച്ചേർത്തു."ഞങ്ങൾ എല്ലാ മാസവും 250 മുതൽ 300 വരെ സ്റ്റുഡന്റ് വിസ ഫയലുകൾ പ്രോസസ്സ് ചെയ്യുന്നു, കഴിഞ്ഞ മാസത്തിലും ഞങ്ങൾ ഇത് തന്നെ ചെയ്തു. കഴിഞ്ഞ ഒരു മാസത്തിനിടെ ഞങ്ങളുടെ വിസ വിജയ നിരക്ക് 90 മുതൽ 92% വരെയാണ്. ഭൂരിഭാഗം ഫയലുകളും പ്രതിസന്ധിക്ക് ശേഷം പ്രോസസ്സ് ചെയ്യപ്പെട്ടതാണ്" പഞ്ചാബിലെ ഏറ്റവും വലിയ ഐഇഎൽടിഎസ് കേന്ദ്രവും ഓവർസീസ് കൺസൾട്ടൻസിയുമായ ജലന്ധറിലെ ജെയിൻ ഓവർസീസിലെ സുമിത് ജെയിൻ പറഞ്ഞു.

കനേഡിയൻ പൗരനും ഖലിസ്ഥാന്‍ വാദിയുമായ ഹർദീപ് സിംഗ് നിജ്ജാറിനെ കൊലപ്പെടുത്തിയതിൽ ഇന്ത്യയുടെ പങ്കാളിത്തമുണ്ടെന്ന കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ ആരോപണത്തെത്തുടർന്ന് ഇരു രാജ്യങ്ങളും തമ്മിലുള്ള ബന്ധം വഷളാവുകായിരുന്നു. എന്നാല്‍ ഈ തർക്കമൊന്നും ഇന്ത്യന്‍ വിദ്യാർത്ഥികളെ സ്വീകരിക്കുന്ന കാനഡയുടെ നയങ്ങളില്‍ മാറ്റമൊന്നും ഉണ്ടാക്കിയിട്ടില്ല. പ്രതിസന്ധി ആരംഭിച്ചതിന് ശേഷം ഈ അപേക്ഷകളിൽ വലിയ കുതിച്ചു ചാട്ടമാണ് ഉണ്ടായതെന്നും വേണമെങ്കില്‍ പറയാം.

ബെന്നുവില്‍ നിന്ന് കണ്ടെത്തിയത് അത്ഭുതകരമായ കാര്യം, സാമ്പിളില്‍ ഇക്കാര്യങ്ങള്‍, സ്ഥിരീകരിച്ച് നാസ

വാഷിംഗ്ടണ്‍: ഭൂമിക്ക് ഏറ്റവും ഭീഷണിയായി കാണുന്ന ബെന്നു ഛിന്നഗ്രഹത്തിന്റെ നിര്‍ണായക വിവരങ്ങള്‍ പുറത്തുവിട്ട് നാസ. ബെന്നുവില്‍ നിന്ന് ശേഖരിച്ച സാമ്പിളുകള്‍ ആദ്യമായി നാസ പുറത്തുവിട്ടു. ഇതിന്റെ ചിത്രങ്ങള്‍ മാധ്യമങ്ങളുമായി പങ്കുവെച്ചിരിക്കുകയാണ്. കറുത്ത മണ്ണാണ് ഇതില്‍ കാണാന്‍ കഴിയുക. ഒരു വലിയ കപ്പ് നിറയെ സാമ്പിളുകള്‍ ശേഖരിച്ചിട്ടുണ്ട്. എന്നാല്‍ എത്രയാണ് ഇതിന്റെ അളവ് എന്ന് മാത്രം അറിയില്ല.

കാര്‍ബണ്‍ നിറഞ്ഞതാണ് ബെന്നുവിന്റെ അന്തരീക്ഷം. നിലവില്‍ ഭൂമിയില്‍ നിന്ന് 97 മില്യണ്‍ കിലോമീറ്റര്‍ അകലെയാണ് ഈ ഛിന്നഗ്രഹമുള്ളത്. അതേസമയം ബെന്നുവില്‍ നിന്ന് ശേഖരിച്ച സാമ്പിളുകളുള്ള പ്രധാനപ്പെട്ട ചേംബര്‍ ഇതുവരെ തുറന്നിട്ടില്ല. ഹൂസ്റ്റണിലുള്ള നാസയുടെ ജോണ്‍സന്‍ സ്‌പേസ് സെന്ററില്‍ വെച്ചുള്ള ചടങ്ങിലാണ് നാസ ബെന്നുവിനെ കുറിച്ചുള്ള കൂടുതല്‍ വിവരങ്ങള്‍ പുറത്തുവിട്ടത്. വളരെ പതിയെയാണ് സാമ്പിളുകള്‍ പരിശോധിക്കുന്നത്.

കാരണം ഇത് സങ്കീര്‍ണമായ പ്രക്രിയയാണ്. അതിന് ഒരുപാട് സമയം ആവശ്യമാണ്. ഈ ദൗത്യത്തിന് നേതൃത്വം നല്‍കിയ ഡാന്റെ ലോറെറ്റ ഇവ വിശദമായി പരിശോധിക്കുന്നുണ്ടെന്ന് സ്ഥിരീകരിച്ചു. നാസയുടെ ഒസിരിസ് റെക്‌സാണ് ബെന്നുവില്‍ നിന്ന് സാമ്പിളുകള്‍ ശേഖരിച്ചത്. അതൊരു ക്യാപ്‌സൂളിലാക്കി ഭൂമിയിലേക്ക് അയക്കുകയായിരുന്നു. ഇന്റേണല്‍ സാമ്പിള്‍ ചേംബറുകളുടെ പുറത്തായി കറുത്ത മണലും, പൊടിപടലങ്ങള്‍ ചിതറി കിടക്കുന്നുണ്ടായിരുന്നു. വലിയൊരു അളവില്‍ ഇനിയും ഈ മണ്ണ് പരിശോധിക്കാനുണ്ടെന്ന് ലോറെറ്റ പറഞ്ഞു.വിലമതിക്കാനാവാത്തതാണ് ബെന്നുവില്‍ നിന്നുള്ള സാമ്പിളുകള്‍ എന്നാണ് നാസ പറയുന്നത്. അതേസമയം ജോണ്‍സന്‍ സെന്ററിലെ ആഘോഷങ്ങളുടെ ഭാഗമായ ഒരാള്‍ പോലും ഈ സാമ്പിളുകള്‍ നേരിട്ട് കണ്ടിട്ടില്ല. കാരണം ഇവ നാസയാണ് രഹസ്യമായി സൂക്ഷിച്ചിരിക്കുകയാണ്. സാമ്പിളിന്റെ ചിത്രങ്ങളും വീഡിയോകളും മാത്രമാണ് പുറത്തുവിട്ടത്.

അടച്ചിട്ടിരിക്കുന്ന പുതിയ ലാബിലാണ് ഈ സാമ്പിളുകള്‍ ഉള്ളതെന്നാണ് റിപ്പോര്‍ട്ട്. സംരക്ഷിത കവചങ്ങളുമായി ലാബില്‍ കയറുന്നവര്‍ക്ക് മാത്രമേ ഈ സാമ്പിളുകള്‍ പരിശോധിക്കാനാവൂ. അതുകൊണ്ട് നല്ലൊരു ശതമാനം ശാസ്ത്രജ്ഞരും ഈ സാമ്പിള്‍ കണ്ടിട്ടില്ല. അതേസമയം കാര്‍ബണെ കൂടാതെ ബെന്നുവില്‍ നിന്നുള്ള ചരലില്‍ ജലത്തിന്റെ അംശവും കണ്ടെത്തിയിട്ടുണ്ട്. കളിമണ്‍ ധാതുക്കളുടെ രൂപത്തിലാണ് ഇവയില്‍ വെള്ളത്തിന്റെ അംശം കണ്ടെത്തിയതെന്ന് ലോറെറ്റ പറഞ്ഞു.

ഭൂമിയിലേക്ക് വെള്ളം എത്തിയത് ഈ രീതിയിലായിരിക്കുമെന്നാണ് നാസ കരുതുന്നതെന്ന് ഇവര്‍ പറയുന്നു. ഇപ്പോള്‍ ബെന്നുവില്‍ കാണുന്ന ധാതുക്കള്‍ നാല് ബില്യണ്‍ മുതല്‍ നാലര ബില്യണ്‍ വര്‍ഷങ്ങള്‍ക്ക് ഭൂമിയില്‍ എത്തിയതാണ്. അതിലൂടെയാണ് നമ്മുടെ ഭൂമി വാസയോഗ്യമായതെന്നും ലോറെറ്റ വ്യക്തമാക്കി. ഇതിലൂടെ സൗരയൂഥവും, ഭൂമിയും എങ്ങനെ ഉണ്ടായി എന്ന് കണ്ടെത്താനാവുമെന്നും നാസ അഡ്മിനിസ്‌ട്രേറ്റര്‍ ബില്‍ നെല്‍സന്‍ പറഞ്ഞു.

ടെക്സാസിനെ വിഴുങ്ങി കാട്ടുതീ...! യുഎസ് ചരിത്രത്തിലെ രണ്ടാമത്തെ വലിയ തീപിടിത്തം

Wildfire in Texas: ഉണങ്ങിയ പുല്ലും ഉയർന്ന താപനിലയും ശക്തമായ കാറ്റുമാണ് തീ ആളിപ്പടരാൻ കാരണം

Wildfire in Texas:അമേരിക്കയിൽ (Amerca) നാശം വിതച്ച് കാട്ടുതീ. ടെക്സാസിന്റെ ചരിത്രത്തിലെ ഏറ്റവും വലിയ കാട്ടുതീയാണ് (Wildfire) രേഖപ്പെടുത്തിയിരിക്കുന്നത്. ഉണങ്ങിയ പുല്ലും ഉയർന്ന താപനിലയും ശക്തമായ കാറ്റുമാണ് തീ ആളിപ്പടരാൻ കാരണമായത്. നിരവധി ആളുകളെ സുരക്ഷിതമായ ഇടത്തേയ്ക്ക് മാറ്റിയിട്ടുണ്ട്. നാല് ദിവസം തുടർച്ചയായി പടർന്നു പിടിക്കുന്ന കാട്ടുതീ ഏറ്റവും അധികം ബാധിച്ചത് വടക്കൻ മേഖലകളെയാണ്. 

റിപ്പോർട്ടുകൾ പ്രകാരം ഇതുവരെ രണ്ട് പേർ കാട്ടുതീയിൽപ്പെട്ട് മരിച്ചതായാണ് സൂചന. വീടുകൾക്കും ജീവനോപാധികൾക്കും ഭീഷണിയാണ് ഈ കാട്ടുതീ. ടെക്സാസിലെ 1 ദശലക്ഷത്തിലധികം ഏക്കർ കത്തിനശിച്ചു, ഒക്ലഹോമയിലേക്ക് വ്യാപിച്ചുകൊണ്ടിരിക്കുകയാണ്. അമേരിക്കയുടെ ചരിത്രത്തിലെ രണ്ടാമത്തെ വലിയ തീപിടിത്തമായാണ് അധികൃതർ കണക്കാക്കുന്നത്. 

ഇതുവരെ 31,500 ഏക്കറിലധികം കത്തിനശിച്ചതായി സംസ്ഥാന ഫോറസ്ട്രി സർവീസ് റിപ്പോർട്ട് ചെയ്തു. ഇന്ത്യൻ തലസ്ഥാനമായ ഡൽഹിയുടെ വിസ്തൃതിയുമായി താരതമ്യപ്പെടുത്തുമ്പോൾ ഏകദേശം മൂന്നിരട്ടി വിസ്തീർണ്ണമുള്ള - 10 ലക്ഷം ഏക്കറിലധികം ഭൂമിയെ കാട്ടുതീ വിഴുങ്ങിക്കഴിഞ്ഞു. ദേശീയ തലസ്ഥാന മേഖലാ ആസൂത്രണ ബോർഡിൻ്റെ കണക്കനുസരിച്ച്, ഡൽഹിയുടെ ആകെ വിസ്തീർണ്ണം 36,6457 ഏക്കറാണ്,

2014ൽ ഉണ്ടായ തീപിടുത്തത്തിൽ നൂറുകണക്കിന് വീടുകൾ നശിച്ചിരുന്ന ഫ്രിച്ച് എന്ന ചെറുപട്ടണത്തേയും ഇപ്പോഴത്തെ കാട്ടുതീ ബാധിച്ചിട്ടുണ്ട്. 2200 ജനസംഖ്യയുടെ പട്ടണത്തിലെ 40-50 വീടുകൾ പൂർണ്ണമായും കത്തി നശിച്ചു.  യുഎസ് മാധ്യമ റിപ്പോർട്ടുകൾ പ്രകാരം, പ്രാദേശിക അധികാരികളുടെ കണക്കനുസരിച്ച് 400,000 ഏക്കർ കത്തിനശിച്ച ടെക്സാസിലെ ഹെംഫിൽ കൗണ്ടിയിൽ നാശനഷ്ടം വളരെ ഗുരുതരമാണ്.

13 വർഷത്തെ ക്രമാനുഗതമായ പരിക്രമണ ക്ഷയത്തിന് ശേഷം ERS-2 ഭൂമിയിലേക്ക്

പ്രവർത്തനത്തിനായി സൗരോർജ്ജത്തെ പ്രാഥമികമായി ആശ്രയിക്കുന്ന ഉപഗ്രഹം 2024 ഫെബ്രുവരി പകുതിയോടെ ഭൂമിയുടെ അന്തരീക്ഷത്തിൽ പ്രവേശിക്കുമെന്നു പ്രതീക്ഷിക്കുന്നു

European satellite to crash on Earth: പതിനാറു വർഷം ഭൂമിയെ നീരീക്ഷിച്ച ശേഷം യൂറോപ്യൻ റിമോട്ട് സെൻസിംഗ് ഉപഗ്രഹമായ (European Remote Sensing satellite) ERS-2 ഭൂമിയിലേക്ക് തിരിച്ചെത്തുന്നു. 13 വർഷത്തെ ക്രമാനുഗതമായ പരിക്രമണ ക്ഷയത്തിന് (gradual orbital decay) ശേഷമാണ് ഭൂമിയുടെ അന്തരീക്ഷത്തിലേക്ക്  ERS-2 ഇറങ്ങാൻ ഒരുങ്ങുന്നത്.

ERS-1ന് പിൻഗാമിയായി 1995ൽ വിക്ഷേപിച്ച ERS-2 ഭൂമിയെക്കുറിച്ചും കലാവസ്ഥവത്യാനത്തെ കുറിച്ചും പഠിക്കാനായിരുന്നു ലക്ഷ്യമിട്ടത്. 2011-ൽ യൂറോപ്യൻ ബഹിരാകാശ ഏജൻസി (ESA) ERS-2ന്റെ പ്രവർത്തനം അവസാനിപ്പിച്ചിരുന്നു. പിന്നീട് ബഹിരാകാശ അവശിഷ്ടങ്ങൾ കുറയ്ക്കാനുള്ള ഉപായങ്ങൾക്ക് അനുസൃതമായി ഒരു നിയന്ത്രിത പരിക്രമണ പ്രക്രിയ ആരംഭിച്ചു.

പ്രവർത്തനത്തിനായി സൗരോർജ്ജത്തെ പ്രാഥമികമായി ആശ്രയിക്കുന്ന  ഉപഗ്രഹം 2024 ഫെബ്രുവരി പകുതിയോടെ ഭൂമിയുടെ അന്തരീക്ഷത്തിൽ പ്രവേശിക്കുമെന്നു പ്രതീക്ഷിക്കുന്നു. ESA-യുടെ സ്‌പേസ് ഡെബ്രിസ് ഓഫീസ് ഉപഗ്രഹത്തിൻ്റെ പാത മറ്റ് അന്താരാഷ്ട്ര പങ്കാളികളികൾക്കൊപ്പം സൂക്ഷ്മമായി നിരീക്ഷിച്ചുകൊണ്ടിരിക്കുകയാണ്.

ഇമേജിംഗ് സിന്തറ്റിക് അപ്പേർച്ചർ റഡാർ, റഡാർ ആൾട്ടിമീറ്റർ, സമുദ്ര-ഉപരിതല താപനില, കടൽക്കാറ്റ് എന്നിവ അളക്കാൻ കഴിവുള്ള സെൻസറുകൾ എന്നിവയുൾപ്പെടെ അത്യാധുനിക ഉപകരണങ്ങളുടെ സജ്ജീകരണത്തോടെയാണ് ERS-1, ERS-2 1990കളിൽ വിക്ഷേപിച്ചത്. അന്തരീക്ഷ ഓസോൺ അളക്കുന്നതിനുള്ള ഒരു സെൻസർ ERS-2ൽ അധികമായിയുണ്ട്.

ERS-2ൻ്റെ പ്രവർത്തന ജീവിതത്തിലുടനീളം, പാരിസ്ഥിതിക പ്രശ്‌നങ്ങൾ  നിരീക്ഷിക്കുന്നതിലും രേഖപ്പെടുത്തുന്നതിലും നിർണായക പങ്ക് വഹിച്ചു. ധ്രുവങ്ങളിലെ ഹിമപാളികൾ, കരയുടെ ഉപരിതലത്തിലെ മാറ്റങ്ങൾ, സമുദ്രനിരപ്പിന്റെ ഉയർച്ച, അന്തരീക്ഷ വ്യതിയാനങ്ങൾ എന്നിവയെക്കുറിച്ചുള്ള അമൂല്യമായ വിവരങ്ങളാണ് ERS-2 നൽകിയത്. ഒറ്റപ്പെട്ട പ്രദേശങ്ങളിലെ വെള്ളപ്പൊക്കത്തിനെയും ഭൂകമ്പത്തിനെയും കുറിച്ച് നിർണായക വിവരങ്ങൾ നൽകി, ദുരന്തനിവാരണത്തിലും  നിർണായകമായ പങ്കുവഹിച്ചു.

എൻവിസാറ്റ് ദൗത്യം, മെറ്റോപ്പ് കാലാവസ്ഥാ ഉപഗ്രഹങ്ങൾ, എർത്ത് എക്സ്പ്ലോറർ സയൻ്റിഫിക് റിസർച്ച് മിഷനുകൾ, കോപ്പർനിക്കസ് സെൻ്റിനൽസ് തുടങ്ങിയ ദൗത്യങ്ങൾക്കുള്ള സാങ്കേതികവിദ്യകൾകുള്ള അടിത്തറ പാകിയ ERS-2 ൻ്റെ പൈതൃകം അതിന്റെ സ്വന്തം ദൗത്യത്തിനപ്പുറമാണ്.

കോപ്പർനിക്കസ് സെൻ്റിനൽ-1 മിഷൻ്റെ റഡാറായി പരിണമിച്ച റഡാർ സാങ്കേതികവിദ്യ, ക്രയോസാറ്റ് മിഷനിലുള്ള റഡാർ ആൾട്ടിമീറ്റർ, കോപ്പർനിക്കസ് സെൻ്റിനൽ-3ലെ റേഡിയോമീറ്റർ തുടങ്ങി, ഇആർഎസ്-2 ആദ്യമായി വഹിച്ച ട്രയൽബ്ലേസിംഗ് ഉപകരണങ്ങൾ പിൻഗാമികൾ ഉപയോഗിക്കുന്നുണ്ടെന്ന് യൂറോപ്യൻ ബഹിരാകാശ ഏജൻസി പറഞ്ഞു. 

ബഹിരാകാശ അവശിഷ്ടങ്ങൾ നമ്മുടെ ഉത്തരവാദിത്വമാണെന്ന് ഓർമ്മിപ്പിക്കുമ്പോൾ ഉപഗ്രഹത്തിൻ്റെ ഭൂമിയിലേക്കുള്ള തിരിച്ചുവരവ് ഒരു യുഗത്തിൻ്റെ അവസാനത്തെ അടയാളപ്പെടുത്തുന്നു.