എംവി ഗോവിന്ദന്റെ കാര്‍ അപകടത്തിൽ പെട്ടു; ആർക്കും പരിക്കില്ല

സിപിഎം സംസ്ഥാന സെക്രട്ടറി എംവി ഗോവിന്ദന്റെ വാഹനം വച്ച് അപകടത്തിൽ പെട്ടു. തിരുവനന്തപുരം തിരുവല്ലം പാലത്തിൽ വെച്ചാണ് സംഭവം. നിയന്ത്രണം തെറ്റി എതിരെ വന്ന വാഹനം ഇടിക്കുകയായിരുന്നു. അപകടത്തിൽ ആർക്കും പരിക്കില്ല.

കോവളത്ത് നടക്കുന്ന സിപിഎമ്മിന്റെ തിരുവനന്തപുരം ജില്ലാ സമ്മേളനത്തിൽ പങ്കെടുക്കാൻ പോവുകയായിരുന്നു അദ്ദേഹം. 

പെട്ടെന്ന് സഡൺ ബ്രേക്കിട്ട കാറിന് പിന്നിൽ ഓട്ടോ ഇടിച്ച് കാര്‍ മുന്നോട്ടു നീങ്ങി. ഇത് എംവി ഗോവിന്ദൻ സഞ്ചരിച്ച കാറിലേക്ക് ഇടിക്കുകയായിരുന്നുവെന്ന് പൊലീസ് അറിയിച്ചു. കാറിന്റെ മുൻ ഭാഗത്തെ കേടുപാടുകളുണ്ട്. എന്നാൽ മൂന്ന് വാഹനങ്ങളിലേയും യാത്രക്കാര്‍ക്ക് പരിക്കില്ല.

എയർ ലിഫ്റ്റിങ്ങിന് പണം ചോദിച്ചതിനെ വിമർശിച്ച് ഹൈക്കോടതി; 132 കോടിയുടെ ബില്ലിൽ വയനാടിന് ചെലവായത് 13 കോടി മാത്രം.

ദുരന്തവേളയിലെ എയര്‍ലിഫ്റ്റിംഗിന് പണം ചോദിച്ച കേന്ദ്ര സര്‍ക്കാരിനെ നീക്കത്തെ വിമര്‍ശിച്ച് ഹൈക്കോടതി. കേന്ദ്രം ചോദിച്ച 132.62 കോടി രൂപയില്‍ 13 കോടി മാത്രമാണ് ചൂരല്‍മല മുണ്ടക്കൈ ദുരന്തത്തിന് ചെലവായതെന്നും 8 വര്‍ഷം മുന്‍പ് വരെയുള്ള ബില്ലുകള്‍ എന്തിനാണ് ഇപ്പോള്‍ നല്‍കിയതെന്നും കോടതി ചോദിച്ചു. വയനാട് ദുരന്തത്തില്‍ ചെലവായ തുക സമ്പന്ധിച്ച് കേന്ദ്രത്തിന് കത്ത് നല്‍കിയെന്ന് കേരളം അറിയിച്ചെങ്കിലും കത്ത് ലഭിച്ചില്ലെന്നായിരുന്നു കേന്ദ്രത്തിന്‍റെ മറുപടി.

ചൂരല്‍മല, മുണ്ടക്കൈ ദുരന്തത്തിന് പിന്നാലെ ദുരന്തമുഖത്ത് കേന്ദ്ര സഹായത്തിന് കേരളം 132.62 കോടി രൂപ സംസ്ഥാന ദുരന്ത നിവാരണ ഫണ്ടില്‍ നിന്ന് അടയ്ക്കണമെന്ന് ആവശ്യപ്പെട്ട് കേന്ദ്രം കത്ത് നല്‍കിയിരുന്നു. ഇതിനെതിരെ വിമര്‍ശനമുയര്‍ന്നതിന് പിന്നാലെയാണ് കത്ത് ഹൈക്കോടതിയിലെത്തിയത് കേന്ദ്രം സമര്‍പ്പിച്ച ബില്ലുകളില്‍ 13 കോടി രൂപ മാത്രമാണ് ചൂരല്‍മല മുണ്ടക്കൈ ദുരന്ത സമയത്ത് ചെലവായത്. ബാക്കി തുക 8 വര്‍ഷം മുന്‍പ് വരെ നടന്ന ദുരന്തങ്ങളിലെ സഹായത്തിനും കൂടി ചേര്‍ത്താണ്. ആദ്യ ബില്ല് 2006ലെ ദുരന്തത്തിന്‍റെതാണ്. ഇതെല്ലാം ഇപ്പോഴെങ്ങനെയാണ് കടന്നുവന്നതെന്നും ഈ സമയത്താണോ എല്ലാ ബില്ലുകളും ഒരുമിച്ച് നല്‍കുന്നതെന്ന കോടതി കേന്ദ്രത്തോട് ചോദിച്ചു. 132 കോടി കേന്ദ്രത്തിലേക്ക് അടയ്ക്കുന്നതിന് പകരം ഇപ്പോള്‍ പൂര്‍ത്തിയാക്കേണ്ട അടിയന്തര ആവശ്യങ്ങള്‍ക്ക് ചെലവിട്ടൂടെ എന്നും കോടതി ചോദിച്ചു. ഇതില്‍ കൃത്യമായ വിശദീകരണം നല്‍കാന്‍ കോടതി കേന്ദ്രത്തോട് ആവശ്യപ്പെട്ടു. 

വയനാട് ദുരന്തവുമായി ബന്ധപ്പെട്ട് ദുരന്ത നിവാരണ ഫണ്ടില്‍ നിന്ന് എത്ര തുക ചെലവിട്ടു എന്നും ബാക്കി എത്രയുണ്ടെന്നുമുള്ള വിശദമായ കണക്ക് കോടതി നിര്‍ദേശപ്രകാരം കേന്ദ്രത്തിന് കൊടുത്തെന്ന് സംസ്ഥാന സര്‍ക്കാര്‍ കോടതിയെ അറിയിച്ചു. കേന്ദ്ര ആഭ്യന്തര സെക്രട്ടറിക്ക് അയച്ച കത്ത് കോടതിയില്‍ ഹാജരാക്കി. ഇതനുസരിച്ച് അടിയന്തര ആവശ്യങ്ങള്‍ക്ക് എത്ര തുക നല്‍കാനാകുമെന്ന് കോടതി കേന്ദ്രത്തോട് ചോദിച്ചു. എന്നാല്‍ ഔദ്യോഗികമായി കത്ത് ലഭിച്ചിട്ടില്ലെന്നായിരുന്നു കേന്ദ്രത്തിന്‍റെ മറുപടി. ഒടുവില്‍ എല്ലാ നടപടി ക്രമങ്ങളും പൂര്‍ത്തിയാക്കി ഇന്ന് തന്നെ കേന്ദ്രത്തിന് കത്തയക്കുമെന്ന് സര്‍ക്കാര്‍ അഭിഭാഷകന്‍ കോടതിയെ അറിയിച്ചു. അവധിക്ക് ശേഷം ജനുവരി 10ന് വയനാട് ദുരന്തവുമായി ബന്ധപ്പെട്ട ഹര്‍ജി ഹൈക്കോടതി വീണ്ടും പരിഗണിക്കും.

മുല്ലപ്പെരിയാർ: ജലനിരപ്പ് ഉയർത്തുമെന്ന പ്രസ്താവന എന്ത് അടിസ്ഥാനത്തിൽ? തമിഴ്നാടിനെതിരെ മന്ത്രി റോഷി അഗസ്റ്റിൻ

മുല്ലപ്പെരിയാർ അണക്കെട്ടിന്റെ ജലനിരപ്പ് ഉയർത്തുമെന്ന തമിഴ്നാടിന്‍റെ പ്രസ്താവന എന്ത് അടിസ്ഥാനത്തിലാണെന്ന് മനസിലാവുന്നില്ലെന്ന് ജലവിഭവ ശേഷി വകുപ്പ് മന്ത്രി റോഷി അഗസ്റ്റിൻ.

 നിലവിൽ സുപ്രീം കോടതിയുടെ പരിഗണനയിലുളള കേസിൽ എന്ത് അടിസ്ഥാനത്തിലാണ് തമിഴ്നാട് ജലനിരപ്പ് ഉയർത്തുമെന്ന രീതിയിലുളള പ്രതികരണം നടത്തുന്നതെന്നതിൽ വ്യക്തതയില്ല. 142 അടിയിൽ ജലനിരപ്പ് ക്രമീകരിക്കാനുള്ള സാഹചര്യമാണ് മുല്ലപ്പെരിയാറിൽ നിലവിലുള്ളത്. പാട്ടക്കരാറിന് പുറത്തുള്ള ഒരിഞ്ച് ഭൂമി പോലും വിട്ടുകൊടുക്കില്ലെന്നും അതിനുള്ള ഒരുതരത്തിലുള്ള ആലോചന പോലുമില്ലെന്നും മന്ത്രി വ്യക്തമാക്കി. 

മുല്ലപ്പെരിയാർ അണക്കെട്ടിലെ ജലനിരപ്പ് 152 അടിയാക്കി ഉയർത്തുമെന്നായിരുന്നു തമിഴ്നാട് ഗ്രാമവികസന മന്ത്രി ഐ.പെരിയസാമിയുടെ പ്രഖ്യാപനം. തമിഴ്നാടിന്റെ സ്വപ്നം ഡിഎംകെ സർക്കാർ യാഥാർത്ഥ്യമാക്കുമെന്നും പെരിയസാമി പറയുന്നു. അണക്കെട്ടിലെ അനുവദനീയമായ സംഭരണശേഷി 10 വർഷമായി 142 അടിയിൽ തുടരുകയല്ലേ എന്ന മാധ്യമപ്രവർത്തകന്റെ ചോദ്യത്തിനായിരുന്നു മറുപടി. തേനിയിൽ മഴക്കെടുതി വിലയിരുത്തിയ ശേഷമുള്ള വാർത്താസമ്മേളനത്തിലായിരുന്നു പ്രതികരണം.

ചീനി മരം മന്ദിരം പടി പാണപിലാവ് റോഡ് മുൻ എരുമേലി ഗ്രാമപഞ്ചായത്ത് പ്രസിഡണ്ടും വാർഡ് മെമ്പറുമായ ജിജിമോൾ സജി ഉദ്ഘാടനം ചെയ്തു

ചീനി മരം മന്ദിരം പടി പാണപിലാവ് റോഡ് മുൻ എരുമേലി ഗ്രാമപഞ്ചായത്ത് പ്രസിഡണ്ടും വാർഡ് മെമ്പറുമായ ജിജിമോൾ സജി ഉദ്ഘാടനം ചെയ്തു.

ബിനു നിരപ്പേൽ അധ്യക്ഷത വഹിച്ച യോഗത്തിൽ വി ടി മാത്യു വെമ്പാലയിൽ,ശ്രീധരൻ കാഞ്ഞിരക്കാട്ട്, ഗോപി കാരിക്കോട്ട്, പ്രശാന്തൻ കളത്തിൽ, മേരിക്കുട്ടി ജോസഫ് കരോട്ട് പുതിയത്, ജോയി തേക്കിൻ കൂട്ടം, ജേക്കബ് ഇടയാടിയിൽ,സജി പുതിയത്ത്, സിബി നെടിയ മുറിയിൽ, ഷിനു വെമ്പാലയിൽ,അജിലാൽ കാരമുള്ളിൽ, രമേശൻ കരികിലാമറ്റം, വർഗീസ് അമ്പാട്ടുപറമ്പിൽ,മധു പുതുപ്പറമ്പിൽ, ഷിബു അമ്മനത്ത്, എബ്രഹാം നെടിയ മുറിയിൽ, സുരേഷ് വെളിയംകുന്നേൽ അനിൽ പന്നാംകുഴിയിൽ പ്രസംഗിച്ചു.

സ്വി​ഗ്ഗിക്ക് കാത്തിരിക്കേണ്ട; ആവശ്യങ്ങൾ നേടിയെടുക്കുന്നത് വരെ ഭക്ഷണം വിതരണം ചെയ്യില്ല, അനിശ്ചിതകാല പണിമുടക്ക്

ഓണ്‍ലൈന്‍ ഭക്ഷ്യവിതരണ സംവിധാനമായ സ്വിഗ്ഗിയിലെ തൊഴിലാളികൾ അനിശ്ചിത കാല പണിമുടക്ക് തുടങ്ങി. ശമ്പള വര്‍ധന ഉൾപ്പെടെ തൊഴിലാളികൾ നാളുകളായി ഉന്നയിക്കുന്ന ആവശ്യങ്ങൾ മാനേജ്മെന്‍റ് അംഗീകരിക്കാത്തതിൽ പ്രതിഷേധിച്ചാണ് സമരം.

 പണിമുടക്കിന് അനുഭാവം പ്രകടിപ്പിച്ച് സൊമാറ്റോയിലെ തൊഴിലാളികൾ ഇന്ന് സൂചന പണിമുടക്കും നടത്തുന്നുണ്ട്. 

സിഐടിയു, ഐഎന്‍ടിയുസി, എഐടിയുസി തൊഴിലാളി യൂണിയനുകൾ സംയുക്തമായാണ് പണിമുടക്ക് ആരംഭിച്ചത്. പണിമുടക്കിയ തൊഴിലാളികൾ തിരുവനന്തപുരത്ത് ഇന്‍സ്റ്റാ മാർട്ടിന് മുന്നിൽ ധർണ നടത്തി. വിവിധ ആവശ്യങ്ങൾ ഉന്നയിച്ച് യൂണിയനുകൾ മാനേജ്മെന്‍റിന് കത്ത് നൽകിയിരുന്നു. പക്ഷേ ഒന്നും അംഗീകരിക്കാൻ മാനേജ്മെന്‍റ് തയ്യാറായില്ല. ശമ്പളം വ‍ധിപ്പിക്കുക, ഫുൾടൈം ജോലി ചെയ്യുന്നവര്‍ക്ക് മിനിമം ഗാരണ്ടിയായി 1250 രൂപ നല്‍കുക, ലൊക്കേഷൻ മാപ്പിൽ കൃത്രിമം കാട്ടുന്നത് അവസാനിപ്പിക്കുക തുടങ്ങിയവയാണ് ആവശ്യങ്ങൾ. ആവശ്യങ്ങൾ നേടിയെടുക്കുന്നത് വരെ ഇനി ഭക്ഷണം വിതരണം ചെയ്യില്ലെന്നാണ് യൂണിയനുകളുടെ നിലപാട്.

ഗതാഗത നിയമ ലംഘനങ്ങള്‍ക്കെതിരെ കര്‍ശന നടപടി; അപകട മേഖലയിൽ പൊലീസും എംവിഡിയും ചേർന്ന് പ്രത്യേക പരിശോധന

ഗതാഗത നിയമ ലംഘനങ്ങള്‍ക്കെതിരെ കര്‍ശന നടപടിയുമായി പൊലീസും മോട്ടോര്‍ വാഹന വകുപ്പും. അമിത വേഗം, മദ്യപിച്ചുള്ള ഡ്രൈവിംഗ് എന്നിവയ്ക്കെതിരെയാണ് കര്‍ശന നടപടി സ്വീകരിക്കും. 

അമിതവേഗം, മദ്യപിച്ചുള്ള ഡ്രൈവിംഗ്, ഹെൽമറ്റ്-സീറ്റ് ബെൽറ്റ് എന്നിവ ധരിക്കാതെയുള്ള യാത്രയ്ക്കെതിരെ കർശന നടപടി സ്വീകരിക്കുമെന്ന് ഉദ്യോ​ഗസ്ഥര്‍ അറിയിച്ചു. അപകട മേഖലയിൽ പൊലീസും എംവിഡിയും ചേർന്ന് പ്രത്യേക പരിശോധന നടത്തും. 

കാൽനട യാത്രക്കാരുടെ സുരക്ഷയ്ക്ക് മുഖ്യ പരിഗണന നല്‍കുമെന്ന് പൊലീസും മോട്ടോര്‍ വാഹന വകുപ്പും അറിയിച്ചു. ബോധവൽക്കരണ പരിപാടിയും നടത്തും. അതേസമയം, എഐ ക്യാമകൾ സ്ഥാപിക്കാത്ത റോഡുകളിൽ ക്യാമറ സ്ഥാപിക്കാനുള്ള റിപ്പോർട്ട് സമർപ്പിക്കാൻ ഐജി ട്രാഫിക്കിന് നിർദ്ദേശം നല്‍കി. ക്രമസമാധാന ചുമതലയുള്ള എഡിജിപി വിളിച്ച യോഗത്തിലാണ് തീരുമാനം. സംസ്ഥാത്ത് അടുത്തിടെ വാഹന അപകടങ്ങള്‍ വര്‍ധിക്കുന്ന സാഹചര്യത്തിലാണ് പൊലീസും മോട്ടോര്‍ വാഹന വകുപ്പും ഗതാഗത നിയമ ലംഘനങ്ങള്‍ക്കെതിരെ കര്‍ശന നടപടിക്ക് ഒരുങ്ങുന്നത്.

വിട്ടുവീഴ്ചയില്ലാത്ത മതനിരപേക്ഷ നിലപാട് , എല്ലാ വിഭാഗം ജനങ്ങളോടുമുളള സ്നേഹനിർഭരമായ ഇടപെടൽ, മനുഷ്യത്വപരമായ കരുതലും ചേർത്തു പിടിക്കലും... ഏവർക്കും പ്രിയപ്പെട്ട മുജീബിനെപ്പറ്റി - ജയിംസ് പി സൈമൺ

എരുമേലിക്കാരുടെ ഏറ്റവും പ്രിയപ്പെട്ട ഒരാൾ ആരെന്ന് ചോദിച്ചാൽ എല്ലാവരും ഒന്നിച്ച് പറയും മുജീബ് റഹ്മാനെന്ന്. ഇന്ന് രാവിലെ നിര്യാതനായ വ്യാപാരി വ്യവസായി ഏകോപന സമിതി നേതാവും സി പി എം നേതാവുമായിരുന്ന മുജീബ് റഹ്മാനെ പറ്റി പറഞ്ഞിട്ടും പറഞ്ഞിട്ടും നാട്ടുകാർക്കും സുഹൃത്തുക്കൾക്കും മതിയാവുന്നില്ല. അത്രമേൽ നന്മ നിറഞ്ഞവനും മികച്ച സംഘാടകനുമായിരുന്നു മുജീബ്. എരുമേലിക്കാരുടെ സോഷ്യൽ മീഡിയ സ്റ്റാറ്റസുകളിലും അനുസ്മരണ പോസ്റ്റുകളിലും അവർ എത്ര മാത്രം മുജീബിനെ സ്നേഹിച്ചിരിന്നൂന്ന് മനസ്സിലാകും. മണിമല ഗ്രാമപഞ്ചായത്ത് മുൻ പ്രസിഡണ്ട് ജയിംസ് പി സൈമണിൻ്റെ അനുഭവക്കുറുപ്പ് ചുവടെ :- പ്രിയപ്പെട്ട സഖാവ് മുജീബ് അണ്ണൻ യാത്രയായി ...... 1989 ൽ പ്രീഡിഗ്രി വിദ്യാർത്ഥിയായി ഞാൻ റാന്നി സെൻ്റ് തോമസ് കോളേജിൽ എത്തുമ്പോൾ ആ ക്യാമ്പസിലെ പുരോഗമന വിദ്യാർത്ഥി പ്രസ്ഥാനത്തിൻ്റെ പ്രധാന പതാകവാഹകരിൽ ഒരാളായി എൻ്റെ സീനിയർ ബാച്ചിൽ മുജീബ് അണ്ണൻ ഉണ്ടായിരുന്നു...... എരുമേലിയിൽ നിന്നും റാന്നിക്ക് വരുന്ന ലെജിൻ ബസ്സിലെ സ്ഥിരം യാത്രക്കാരായിരുന്നു ഞങ്ങൾ ...... ബസ്സിൻ്റെ ഡോറിനോട് ചേർന്ന് സൈഡ് സീറ്റിൽ നിറഞ്ഞ ചിരിയുമായി മുജീബണ്ണൻ ഉണ്ടാകുമായിരുന്നു..... മുക്കടയിൽ നിന്നും ബസ്സിനുള്ളിൽ കയറിപ്പറ്റുന്നതിന് മുമ്പ് തന്നെ പുസ്തകവും, ഭക്ഷണപ്പൊതിയുമൊക്കെ സൈഡ് സീറ്റിലിരിക്കുന്ന മുജീബണ്ണനെ ഏൽപ്പിക്കും..... ഇങ്ങനെ എട്ടോ പത്തോ പേരുടെ ലഗേജും മടിയിൽ വച്ചുകൊണ്ടാവും അദ്ദേഹത്തിൻ്റെ യാത്ര.....

ഇതിനിടയിൽ വാതോരാത്ത വർത്തമാനങ്ങളും ...... ലോകത്ത് നടക്കുന്ന എല്ലാ സംഭവങ്ങളെക്കുറിച്ചുമുള്ള ഗൗരവ ചർച്ചകളാൽ മുഖരിതമാകുമായിരുന്നു ആ ബസ്സും അതിലെ അന്തരീക്ഷവുമെല്ലാം ..... ഒടുവിൽ അഭിപ്രായങ്ങളെല്ലാം സമുന്വയിപ്പിച്ച് ഇടതുപക്ഷത്തിനനുകൂലമാക്കി മാറ്റുന്ന ഒരു പ്രത്യേക മെക്കനിസം വർക്ക് ഔട്ട് ചെയ്യിക്കാൻ അദ്ദേഹത്തിനറിയാമായിരുന്നു ആ യാത്രകളെല്ലാം ഇപ്പോഴും അത്രയ്ക്ക് പ്രിയപ്പെട്ടവയായി എൻ്റെ മനസിൽ നിറഞ്ഞുനിൽക്കുന്നു..... ആ അദ്ധ്യയന വർഷം SFI യുടെ നേതൃത്വത്തിൽ തുടർച്ചയായ ദിവസങ്ങളിൽ നടന്ന 96 നാൾ നീണ്ടു നിന്ന സമരം..... ആശയ പ്രചരണങ്ങൾ,സംഘർഷങ്ങൾ, ..... എല്ലാറ്റിനും നേതൃനിരയിൽ മുജീബ് അണ്ണൻ ഉണ്ടായിരുന്നു...... ക്യാമ്പസ് വിട്ടതിനു ശേഷം, തുടർപഠനത്തിനായി മറ്റൊരിടത്തേക്ക് ...... പിന്നീട് തിരികെ എത്തി തൻ്റെ പിതാവ് നടത്തിവന്ന പലചരക്ക് കട ഏറ്റെടുത്ത് നടത്തൽ..... CPIM ൻ്റെ ഭാഗമായി നിന്ന് എരുമേലിയിൽ നടത്തിയ രാഷ്ട്രീയ സംഘടനാ പ്രവർത്തനങ്ങൾ ...... വിട്ടുവീഴ്ചയില്ലാത്ത മതനിരപേക്ഷ നിലപാട് , എല്ലാ വിഭാഗം ജനങ്ങളോടുമുളള സ്നേഹനിർഭരമായ ഇടപെടൽ, മനുഷ്യത്വപരമായ കരുതലും ചേർത്തു പിടിക്കലും...... വ്യാപാരി സംഘടനാ രംഗത്തെ ത്യാഗോജ്വല പ്രവർത്തനങ്ങൾ. സംഭവബഹുലമെങ്കിലും ആ ജീവിതം എരുമേലിയുടെ, രാഷ്ട്രീയ, സാമൂഹ്യ, സാംസ്കാരിക മണ്ഡലങ്ങളിൽ ശാന്ത സുന്ദരമായി ഇങ്ങനെ ഒഴുകിയിരുന്നു..... ഇടയ്ക്കെപ്പോഴോ പിടികൂടിയ രോഗം തന്നെ കീഴ്പ്പെടുത്താൻ ശ്രമിക്കുമ്പോഴും വേദനയടക്കി.... അപാരമായ മനസാന്നിദ്ധ്യവുമായി ഒരു തിരിച്ചുവരവിനായി പരമാവധി പരിശ്രമിച്ച മുജീബണ്ണൻ തന്നെ സ്നേഹിച്ചവരെയെല്ലാം കണ്ണീരിലാഴ്ത്തി കടന്നുപോയിരിക്കുന്നു.....

വിദ്യാർത്ഥി സംഘടനാ പ്രവർത്തനകാലം മുതൽ ആരംഭിച്ച മൂന്നരപ്പതിറ്റാണ്ടു നീണ്ടുനിന്ന ഞങ്ങളുടെ ഊഷ്മളമായ ആത്മബന്ധത്തിനാണ് തിരശ്ശീല വീണിരിക്കുന്നത്..... ഇന്ന് രാവിലെ അദ്ദേഹത്തിൻ്റെ ദേഹവിയോഗവാർത്തയറിഞ്ഞ് വീട്ടിലെത്തി ആ ചേതനയറ്റ മുഖത്തേക്ക് നോക്കുമ്പോൾ പറയാൻ ചിലതെല്ലാം ബാക്കി വച്ചിരുന്നോ..... അടുത്തെങ്ങും കണ്ടുമുട്ടാൻ കഴിയാത്തതിൻ്റെ പരിഭവം ഒളിഞ്ഞിരിപ്പുണ്ടായിരുന്നോ........ ഓർമ്മകളുടെ വേലിയേറ്റം....... വല്ലാത്ത സങ്കടം ...... ഇനി എരുമേലിയിൽ എത്തുമ്പോൾ മുജീബണ്ണൻ്റെ കടയിൽ നിറഞ്ഞ ചിരിയുമായി അദ്ദേഹമുണ്ടാവില്ലല്ലോ..... അത്യന്തം ഹൃദയവേദനയോടെ...... പ്രിയ സഖാവിന് അന്ത്യാഭിവാദനങ്ങൾ...

കണമല - തുലാപ്പള്ളി ഭാഗത്ത് പമ്പയാറ്റിൽ അജ്ഞാത മൃതദേഹം

എരുമേലി: തുലാപ്പള്ളി ആലപ്പാട്ട് ഭാഗത്ത് പമ്പയാറ്റിൽ അജ്ഞാത മൃതശരീരം. എകദേശം 50 വയസ് തോന്നിക്കുന്ന മധ്യവയസ്ക്കൻ്റെ മൃതദേഹമാണ് ഇന്ന് രാവിലെ നാട്ടുകാരുടെ ശ്രദ്ധയിൽ പെട്ടത്. പമ്പ പോലീസ് സ്റ്റേഷൻ പരിധിയിലാണ് മൃതദ്ദേഹം. നാട്ടുകാർ പോലീസിനെ വിവരം അറിയിച്ചിട്ടുണ്ട്.

പമ്പയിൽകുളിക്കുവാൻ ഇറങ്ങിയ അന്യസംസ്ഥാന ഭക്തരാരെങ്കിലും കുത്തൊഴുക്കിൽ പെട്ട് അപായത്തിലായതാകാനും സാധ്യതയുണ്ട്. കഴിഞ്ഞ ദിവസങ്ങളിലെ അതിശക്തമായ മഴയിൽ മറ്റെവിടെ നിന്നെങ്കിലും ഒഴുകി മൃതദേഹം ഒഴുകി എത്തിയതാണോയെന്നും സംശയിക്കുന്നു.

എരുമേലി തോട്ടുവായിൽ കരുണാകരൻ നിര്യാതനായി

എരുമേലി: പേരൂർത്തോട് തോട്ടുവായിൽ കരുണാകരൻ (86) നിര്യാതനായി. ഭാര്യ പരേതയായ തങ്കമ്മ റാന്നി വലിയകാവ് പൂവത്തൂർ കുടുംബാംഗമാണ്.

മക്കൾ : സുഷമ(ബാംഗ്ലൂർ ), സുജാത(കുമളി ),ഷാജി മരുമക്കൾ: ദിവാകരൻ, മോഹനൻ, വിജി. സംസ്ക്കാരം:ശനിയാഴ്ച ഉച്ചകഴിഞ്ഞ് 3-ന് പേരൂർത്തോട്ടിലെ വീട്ടുവളപ്പിൽ

എരുമേലിയിൽ ശബരിമല തീർത്ഥാടകർ സഞ്ചരിച്ച മിനി ബസ് മറിഞ്ഞു

എരുമേലിയിൽ ശബരിമല തീർത്ഥാടകർ സഞ്ചരിച്ച മിനി ബസ് മറിഞ്ഞു.അട്ടിവളവിൽ രാത്രി എട്ടരയോടെയാണ് അപകടം ഉണ്ടായത്. തമിഴ്‌നാട് സ്വദേശികൾ സഞ്ചരിച്ച വാഹനമാണ് അപകടത്തിൽപ്പെട്ടത്.

അപകടത്തിൽ മൂന്ന് പേർക്ക് പരുക്കുണ്ട്. പരുക്കേറ്റവരെ എരുമേലി ഗവൺമെന്റ് ആശുപത്രിയിൽ പ്രവേശിപ്പിച്ചിട്ടുണ്ട്. മോട്ടർ വാഹന വകുപ്പിൻ്റെ പെട്രോളിങ് സംഘമാണ് രക്ഷാ പ്രവർത്തനം നടത്തിയത്

എസ് എൻ ഡി പി ചേനപ്പാടി ശാഖായോഗം നേതൃത്വ ശില്പശാല ശനിയാഴ്ച

എരുമേലി: എസ്.എൻ.ഡി.പി യോഗം ചേനപ്പാടി 53-ാം നമ്പർ ശാഖാ യോഗത്തിലെ നേതൃത്വ പരിശീലനവും ശില്പശാലയും ശനിയാഴ്ച വൈകിട്ട് 6 .30ന് ശാഖാ ഹാളിൽ വച്ച് പ്രസിഡന്റ് ബിനു കൂവക്കാട്ടിന്റെ അദ്ധ്യക്ഷതയിൽ നടക്കും. ശില്പശാല എരുമേലി എസ്.എൻ.ഡി.പി. യൂണിയൻ കൺവീനർ പി. എസ്. ബ്രഷ്നേവ് ഉദ്ഘാടനം നിർവഹിക്കും.

കുടുംബയോഗങ്ങൾക്കുള്ള മാർഗ്ഗനിർദേശവും പരിശീലനവും ശ്രീമദ് ഗുരുപ്രകാശം സ്വാമികൾ (ശിവഗിരി മഠം) നൽകുകയും അനുഗ്രഹ പ്രഭാഷണം നടത്തുകയും ചെയ്യും. യൂണിയൻ കൗൺസിലർ ഷിൻ ശ്യാമളൻ സംഘടനാ സന്ദേശം നൽകും. സെക്രട്ടറി ഷിബു മുപ്പതിൽ സ്വാഗതം ആശംസിക്കും. പി.കെ രാജൻ കൃതജ്ഞത അർപ്പിക്കും

കടന്നൽ കൂട്ടത്തിൻ്റെ ആക്രമണത്തിൽ പരിക്കേറ്റ് 6 പേർ ആശുപത്രിയിൽ

എരുമേലി : തൂങ്കുഴിപ്പടി ഭാഗത്ത് വ്യാഴാഴ്ച രാവിലെ റബ്ബർ ടാപിംഗിനിടെയാണ് വെൺകുറിഞ്ഞി തോട്ടുവായിൽ ശിവപ്രസാദ് (65) ഉഷാശിവപ്രസാദ് (60) എന്നിവർക്ക് സാരമായി പരുക്കേറ്റത്. കടന്നൽ കൂട്ടത്തിൻ്റെ ആക്രമണത്തിൽ പെട്ട ഇരുവരുടേയും നിലവിളി കേട്ടെത്തിയ അയൽവാസിയായ ചെങ്ങാട്ട് വീട്ടിൽ സൂരജ് 

എന്ന യുവാവിൻ്റെ സമയോചിതമായ രക്ഷാപ്രവർത്തനമാണ് അവരെ ജീവിതത്തിലേക്ക് തിരിച്ചെത്തിച്ചത്.

തൊട്ടടുത്ത തോട്ടിൽ കുളിക്കാനെത്തിയ സൂരജ് ഇരുവരുടേയും തലയിൽ കൂടി തുണിയിട്ട് മൂടി തോട്ടിലെത്തിച്ച് വെള്ളത്തിൽ മുങ്ങിപ്പൊങ്ങി നില്ക്കാൻ സഹായിച്ചു. ശിവപ്രസാദിന് 52-ഓളം കടന്നൽ കുത്തുകൾ തലയിലും മുഖത്തുമായി ഏറ്റിരുന്നു. ഉഷാ ശിവപ്രസാദിന് 15 ഓളം കടന്നൽ കുത്തുകളും കിട്ടി. അവശരായ ഇരുവരേയും കാറിൽ കയറ്റി അതിവേഗം എരുമേലി ഗവൺമെൻ്റ് ആശുപത്രിയിലും തുടർന്ന് നില വഷളായതിനെ തുടർന്ന് 26-ാം മൈൽ മേരി ക്യൂൻസ് ആശുപത്രിയിലും പ്രവേശിപ്പിച്ചു. വ്യാഴാഴ്ച രാത്രിയോടെയാണ് ശിവ പ്രസാദിനെ അത്യാഹിത വിഭാഗത്തിൽ നിന്നും റൂമിലേക്ക് മാറ്റിയത്. രക്ഷാപ്രവർത്തനത്തിനെത്തിയ സൂരജിനും കൂടെ എത്തിയ സൂരജിൻ്റെ സ്ക്കൂൾ വിദ്യാർത്ഥിയായ മകനും കടന്നൽ കുത്തേറ്റു.

കഴിഞ്ഞ ദിവസം മുണ്ടക്കയം പാക്കാനത്ത് കടന്നൽ കുത്തേറ്റ് അമ്മയും മകളും മരിച്ചിരുന്നു. വെള്ളിയാഴ്ച രാവിലെ തൂങ്കുഴിപ്പടി വഴി സ്കൂട്ടറിൽ സഞ്ചരിച്ചിരുന്ന മണിപ്പുഴ മത്തായി (52)ക്കും വെൺകുറിഞ്ഞി ശ്രീകുമാറി (45 )നും കടന്നൽ കുത്തേറ്റു.ഇരുവരും എരുമേലി ഗമണമെൻ്റ് ആശുപത്രിയിൽ ചികിത്സ തേടി. വനം വന്യജീവിവകുപ്പിനെ ഇക്കാര്യങ്ങൾ അറിയിച്ചെങ്കിലും മേൽ നടപടികളൊന്നും ഉണ്ടായിട്ടില്ല.

ദിവ്യാ ശ്രീധറിൻ്റെ കാത്ത് കാത്തിരുന്നൊരു കല്യാണം ഇതാ യൂട്യൂബിൽ

ദിവ്യാ ശ്രീധറിൻ്റെ കാത്ത് കാത്തിരുന്നൊരു കല്യാണം ഇതാ യൂട്യൂബിൽ ക്രിസ് വേണുഗോപാലിനെ കല്യാണം കഴിച്ച് സോഷ്യൽ മീഡിയയിൽ താരമായ സിനിമാ സീരിയൽ നടി ദിവ്യാ ശ്രീധറിൻ്റെ "കാത്ത് കാത്തിരുന്നൊരു കല്യാണം"ഇതാ ഇപ്പോൾ യൂട്യൂബിൽ കാണാം. ചെറുകര ഫിലിംസിൻ്റെ ബാനറിൽ കഥ - സംവിധാനം ജയ്ൻ ക്രിസ്റ്റഫർ നിർവ്വഹിച്ച സാമൂഹ്യ യാഥാർത്ഥ്യങ്ങൾ പറയുന്ന സിനിമ ഇന്ന് മുതൽ യൂട്യൂബിൽ ലഭ്യമാണ്.തിരക്കഥയും സംഭാഷണവും നന്ദൻ്റേതാണ്. 2023 ഡിസമ്പർ 15 മുതൽ 28 ദിവസം തിയറ്ററുകളിൽ വിജയകരമായി പ്രദർശനം നടത്തി പ്രേക്ഷക പ്രശംസ നേടിയ സിനിമയാണ് കാത്ത് കാത്തിരുന്നൊരു കല്യാണം.

ഡോ.സൗമ്യ സരിനെതിരെ സൈബർ ആക്രമണം - കമൻ്റ് ബോക്സ് പൂട്ടി വയ്ക്കാനുദ്ദേശമില്ലെന്ന് സൗമ്യയും

രാഹുൽ മാങ്കൂട്ടത്തിന് പാലക്കാട് സീറ്റ് നല്കിയ രീതിക്കെതിരെ പ്രതിഷേധിച്ച് കോൺഗ്രസിൽ നിന്നും എൽ ഡി എഫിലെത്തിയ ഡോ. പി സരിൻ്റെ ഭാര്യയാണ് ഡോ. സൗമ്യാ സരിൻ. വർഷങ്ങളായി സോഷ്യൽ മീഡിയയിൽ സജീവമായിട്ടുള്ള ഡോക്ടറാണ് സൗമ്യ. ഡോ.സൗമ്യ സരിൻ്റെ ഫേസ് ബുക്ക് പോസ്റ്റ് ചുവടെ:- ഞങ്ങൾ ഡോക്ടർമാർ ഈ കോട്ട് ഇടുന്നത് ഒരു സംരക്ഷണത്തിനാണ്. അതായത് പുറത്തു നിന്നുള്ള അണുക്കൾ നമ്മുടെ ശരീരത്തിലേക്ക് കയറുന്നത് തടയാനുള്ള ഒരു കവചം! ഇങ്ങനെ ഒരു കവചം ഞാനും എനിക്ക് ചുറ്റും തീർത്തിട്ടുണ്ട്. പുറത്തു നിന്നുള്ള പുച്ഛവും പരിഹാസവും കുത്തുവാക്കുകളും തെറിവിളികളും ഒന്നും ഉള്ളിലേക്ക് കയറാതിരിക്കാൻ 😊. അങ്ങിനെ ഒരു കവചം കുറെ കാലം കൊണ്ട് മനഃപൂർവം തന്നെ ഉണ്ടാക്കി എടുത്തതാണ്. പ്രത്യേകിച്ച് രണ്ടു കാരണങ്ങൾ കൊണ്ട്. 1. ഞാൻ സോഷ്യൽ മീഡിയയിൽ ആക്റ്റീവ് ആയി ഇടപെടുന്ന ഒരാൾ ആണ്. പല വിഷയങ്ങളും സംസാരിക്കാനുണ്ട്. അതിൽ ഇപ്പോൾ വേണമെങ്കിലും ഒരു വിവാദം ഉയർന്നു വരാം. വന്നിട്ടുണ്ട് പലതവണ. അതുകൊണ്ട് തന്നെ ഈ പ്ലാറ്റഫോമിൽ നില്കുന്നിടത്തോളം നല്ലൊരു തൊലിക്കട്ടി ആവശ്യമാണ് എന്ന ബോധ്യം കാലക്രമേണ വന്നു ചേർന്നതാണ്. 2. എന്റെ പാർട്ണർ അദ്ദേഹത്തിന്റെ വഴിയായി തിരഞ്ഞെടുത്തത് രാഷ്ട്രീയമാണ്. അവിടെയും എന്തും എപ്പോഴും സംഭവിക്കാം. അതെന്റെ കയ്യിൽ അല്ല. അങ്ങിനെ സംഭവിക്കുമ്പോൾ ഭാര്യ എന്ന നിലയിൽ എനിക്ക് നേരെയും ആക്രമണം ഉണ്ടാകും. സ്വാഭാവികം. ഇനി ഇപ്പോൾ തെറി വിളിക്കുന്നവരോടാണ്. ഞാൻ ഇവിടെ തന്നെയുണ്ട്. കമെന്റ് ബോക്സ്‌ ഓഫ്‌ ചെയ്യാൻ പലരും ഉപദേശിച്ചു. ഒരിക്കലും ചെയ്യില്ല. നിങ്ങൾക്ക് എന്ത് വേണമെങ്കിലും പറയാം.

പക്ഷെ എനിക്ക് എന്റേതായ ബോധ്യങ്ങൾ ഉണ്ട്. അത് എന്റെ ഭർത്താവ് എവിടെ നില്കുന്നു എന്ത് ചെയ്യുന്നു എന്ന് നോക്കിയല്ല. കാരണം ഞങ്ങൾ രണ്ടു വ്യത്യസ്ത വ്യക്തികൾ ആണ്. കാഴ്ചപ്പാടുകളും നിലപാടുകളും ആഗ്രഹങ്ങളും ഒക്കെ വ്യത്യസ്തമായ രണ്ടു പേർ. ഞങ്ങളെ ഒരുമിച്ചു നിർത്തുന്നത് വ്യക്തിപരമായി ഞങ്ങൾക്കിടയിലുള്ള മറ്റു പലതുമാണ്. അത് ഞങ്ങളുടെ വീടിന്റെ വാതിലിന്റെ ഇപ്പുറത്താണ്. അല്ലാതെ അപ്പുറത്തുള്ള രാഷ്ട്രീയമോ നിലപാടുകളോ ഒന്നുമല്ല. പക്ഷെ സ്ത്രീകളെ വെറും ഭാര്യമാർ മാത്രമായി കാണുന്ന ബഹുഭൂരിപക്ഷത്തിന് അത് മനസ്സിലാവില്ല എന്നും എനിക്കറിയാം. അവരുടെ മേൽ ഭർത്താക്കന്മാരുടെ ലേബൽ പതിപ്പിക്കപ്പെടുന്നതും സ്വാഭാവികം. ഞാൻ നിങ്ങളോട് എപ്പോഴാണ് രാഷ്ട്രീയം പറഞ്ഞത്? എന്റെ രാഷ്ട്രീയ നിലപാടുകൾ എന്താണെന്നു എപ്പോഴെങ്കിലും ഞാൻ ചർച്ച ചെയ്തിട്ടുണ്ടോ? ഇല്ലാ. കാരണം എന്റെ വഴി രാഷ്ട്രീയമല്ല. ഞാൻ സമൂഹത്തിൽ എന്റെ റോൾ എന്താണെന്നു കൃത്യമായി മനസ്സിലാക്കി അത് ചെയ്തു മുന്നോട്ട് പോകുന്ന ഒരാൾ ആണ്. വ്യക്തിപരമായി എനിക്കും മകൾക്കും എതിരെ അധിക്ഷേപങ്ങൾ വന്നപ്പോൾ പ്രതികരിച്ചിട്ടുണ്ട്. അപ്പോഴും ഞാൻ വ്യക്തമായി പറഞ്ഞത് ഒന്ന് മാത്രം. എന്റെ ആത്മാഭിമാനവും നിലപാടുകളും സംരക്ഷിക്കാനുള്ള ആർജവം എനിക്ക് തനിച്ചുണ്ട്. എനിക്ക് ഒരു കൊടിയുടെയും സൈബർ പോരാളികളുടെയും സഹായം വേണ്ട. ഒരു കാലത്ത് എന്നേ സപ്പോർട്ട് ചെയ്ത് സംസാരിച്ചിരുന്നവർ ഇന്ന് എതിർപക്ഷത് നിന്നും ചീത്ത വിളിക്കുന്നു. തിരിച്ചും. ഇതൊക്കെ ഞാൻ ആ സ്പിരിറ്റിൽ മാത്രമേ കാണുന്നുള്ളൂ. കാരണം നിങ്ങൾ ആരും എന്നേ ' സൗമ്യ ' ആയി കണ്ടു ഞാൻ എന്താണെന്നു മനസ്സിലാക്കി സ്നേഹിച്ചവരല്ല. അതുകൊണ്ട് തന്നെ അതിനൊക്കെ അത്ര ആയുസ്സ് മാത്രമേ ഉണ്ടാകൂ എന്ന തിരിച്ചറിവ് എനിക്കുണ്ട്. അതുകൊണ്ട് തന്നെ തന്ന സ്നേഹത്തിലും ഇപ്പോഴത്തെ വെറുപ്പിലും ഒന്നും ഞാൻ പതറില്ല.

ഈ സോഷ്യൽ മീഡിയ ലോകത്തിനപ്പുറം ഒരു കൊടിയുടെ നിറവും നോക്കാതെ എന്നെ ചേർത്ത് പിടിക്കാൻ ഒരു പിടി ആളുകൾ എനിക്കുണ്ട്. എന്‍റെ സുഹൃത്തുക്കൾ! അവരിൽ ഇടതും വലതും മുന്നും പിന്നും ഒക്കെ നിൽക്കുന്നവർ ഉണ്ട്. അവർക്ക് എന്നെ അറിയാം. അത് മാത്രം മതി ഇപ്പോൾ എനിക്ക്! എപ്പോഴും! ഞാൻ, ഡോ. സൗമ്യ സരിൻ, ഈ പേര് ഈ സമൂഹത്തിൽ കുറച്ചു പേർക്കെങ്കിലും അറിയുമെങ്കിൽ അതിനു പുറകിൽ എന്റെ വിയർപ്പാണ്. എന്റെ അധ്വാനമാണ്. എന്റെ മേൽവിലാസം ഞാൻ ഉണ്ടാക്കിയതാണ്. ഒരു ഡോക്ടർ എന്ന നിലയിൽ എന്നാൽ കഴിയുന്ന വിധം ആളുകളിലേക്ക് ഇറങ്ങി ചെല്ലാൻ ഞാൻ ശ്രമിച്ചിട്ടുണ്ട്. ഈ പേജു പോലും അതിനു വേണ്ടി മാത്രമേ ഉപയോഗിച്ചിട്ടുള്ളു. ഇന്ന് കുഞ്ഞു കുട്ടികളുടെ സൗജന്യ ഹൃദയ ശാസ്ത്രക്രിയയെ കുറിച്ച് ഇട്ട പോസ്റ്റിന്റെ താഴെ വന്നു പോലും വെറുപ്പ് വിളമ്പുന്ന ആളുകൾക്ക് ഞാൻ പറയുന്നത് എത്ര മനസ്സിലാവും എന്നെനിക്കറിയില്ല. എങ്കിലും പറയുകയാണ്. എന്റെ മേലുള്ള ഈ വെള്ള കോട്ട്, അത് അധ്വാനത്തിന്റെ വെളുപ്പാണ്. അതിൽ ചെളി പറ്റിക്കാൻ ഉള്ള കെൽപ് തത്കാലം എന്റെ കമ്മെന്റ് ബോക്സിനില്ല!

താങ്ങായി ലുലു ​ഗ്രൂപ്പ്, ജപ്തതി ചെയ്‌ത വീട് സന്ധ്യയ്ക്കും മക്കൾക്കും തിരികെ ലഭിച്ചു; ഒപ്പം 10 ലക്ഷം രൂപ സ്ഥിര നിക്ഷേപവും

എറണാകുളം പറവൂരിൽ സ്വകാര്യ ധനകാര്യ സ്ഥാപനം ജപ്തതി ചെയ്‌ത വീട് സന്ധ്യയ്ക്കും മക്കൾക്കും തിരികെ ലഭിച്ചു. വീടിൻ്റെ താക്കോൽ സന്ധ്യയ്ക്ക് കൈമാറി. ലുലു ഗ്രൂപ്പാണ് മണപ്പുറം ഫിനാൻസിന് പണം കൈമാറിയത്. ലുലു ഗ്രൂപ്പ് മീഡിയ കോർഡിനേറ്റർ സ്വരാജാണ് താക്കോൽ സന്ധ്യയ്ക്ക് കൈമാറിയത്. ഒപ്പം 10 ലക്ഷം രൂപ സ്ഥിര നിക്ഷേപമായി സന്ധ്യയുടെയും മക്കളുടെയും പേരിൽ നൽകും ഇവരുടെ കടബാധ്യതകൾ മുഴുവൻ ഏറ്റെടുക്കുമെന്നും ലുലു ഗ്രൂപ്പ് അറിയിച്ചിരുന്നു. സന്ധ്യയും മക്കളും വീട്ടിലില്ലാതിരുന്ന സമയത്താണ് വീട് ജപ്തി ചെയ്തത്. വീടിനകത്തുണ്ടായ സാധനങ്ങൾ പോലും എടുക്കാൻ സാധിച്ചില്ല. വീട്ടിൽ കയറാതെ പച്ചവെള്ളം പോലും കുടിക്കില്ലെന്ന ഉറച്ച തീരുമാനത്തിലായിരുന്നു സന്ധ്യ. പിന്നാലെയാണ് ലുലുഗ്രൂപ്പ് വായ്‌പ് ഏറ്റെടുക്കുകയും രാത്രി തന്നെ കുടുംബത്തിന് വീട്ടിൽ തിരികെ പ്രവേശിക്കാൻ അവസരം ഒരുക്കുകയും ചെയ്‌തത്.

2019ലാണ് സന്ധ്യ സ്വകാര്യ ധനകാര്യസ്ഥാപനത്തിൽ നിന്ന് നാല് ലക്ഷം രൂപ വായ്‌പയെടുത്തത്. ലൈഫ് ഭവന പദ്ധതിയിൽ അനുവദിച്ച വീടിൻ്റെ നിർമ്മാണം പൂർത്തീകരിക്കാനായിട്ടായിരുന്നു പണം വായ്‌പയെടുത്തത്. രണ്ട് വർഷം മുൻപ് ഭർത്താവ് സന്ധ്യയെയും മക്കളെയും ഉപേക്ഷിച്ച് പോയിരുന്നു. വീട് ഇയാളുടെ പേരിലായിരുന്നു. സ്വകാര്യ സ്ഥാപനത്തിലെ ജീവനക്കാരിയാണ് സന്ധ്യ. 9000 രൂപയായിരുന്നു സന്ധ്യയുടെ ശമ്പളം. ഈ വരുമാനം കൊണ്ട് വായ്‌പ തിരിച്ചടവ് സാധ്യമാകാതെ വന്നതോടെയാണ് വായ്‌പാ തിരിച്ചടവ് മുടങ്ങിയത്. വീട് സന്ധ്യയുടെ പേരിലേക്ക് മാറ്റണമെന്നും അവർ ആവശ്യപ്പെട്ടിട്ടുണ്ട്.

എഞ്ചൽവാലി -പമ്പാവാലി പ്രദേശങ്ങളെ പെരിയാർ ടൈഗർ റിസർവ്വ് മേഖലയിൽ നിന്നും ഒഴിവാക്കി കിട്ടുന്നതിന് പിന്നിൽ അഡ്വ. സെബാസ്റ്റ്യൻ കുളത്തുങ്കൽ എം എൽ എ യുടെ അക്ഷീണ പ്രയത്നം

 1978 ലെ ഏ കെ ആൻ്റണിയുടെ നേതൃത്വത്തിലുള്ള കോൺഗ്രസ് മന്ത്രിസഭയുടെ കാലഘട്ടത്തിലാണ് എഞ്ചൽവാലി - പമ്പാവാലി പ്രദേശങ്ങൾ പെരിയാർ ടൈഗർ റിസർവ്വിൻ്റെ ഭാഗമായി മാറുന്നത്. ടൈഗർ റിസർവ്വ് വനമേഖയിൽ പെടുന്ന പ്രദേശങ്ങൾ കേന്ദ്രം വനം വന്യജീവി വകുപ്പിൻ്റെ കർശന നിയന്ത്രണത്തിലാവുന്നത് സാധാരണമാണ്. 1978 കാലഘട്ടത്തിൽ കൃഷിക്കാർ തിങ്ങിപ്പാർക്കുന്ന ഈ പ്രദേശം ടൈഗർ റിസർവ്വിൽ ഉൾപ്പെട്ടതിനെതിരെ ശക്തമായി പ്രതികരിക്കാൻ പോലും രാഷ്ട്രീയ പാർട്ടി നേതാക്കളാരും തയ്യാറായിരുന്നില്ല.

നാല് പതിറ്റാണ്ടോളം പമ്പാവാലി മേഖലയിലെ ജനങ്ങൾ ആശങ്കയിൽ തുടരുകയായിരുന്നു.

2021-ൽ രണ്ടാം പിണറായി സർക്കാർ അധികാരത്തിൽ വരുകയും പൂഞ്ഞാർ എം എൽ എ ആയി അഡ്വ സെബാസ്റ്റ്യൻ കുളത്തുങ്കൽ എം എൽ എ ആയി തിരഞ്ഞെടുക്കപ്പെടുകയും ചെയ്ത ശേഷമാണ് പമ്പാവാലി മേഖലയിലുള്ളവരുടെ ആശങ്ക അകറ്റാൻ ആത്മാർത്ഥ പരിശ്രമമുണ്ടായത്. എം എൽ എ യുടെ പരിശ്രമങ്ങളുടെ നാൾ വഴികൾ ചുവടെ:-

2023 ജനുവരി 4

എരുമേലി ഗ്രാമപഞ്ചായത്തിലെ 11, 12 വാർഡുകൾ വന മേഖലയായി ചിത്രീകരിക്കപ്പെട്ടതിനെ തുടർന്ന്    ജനങ്ങൾക്കുണ്ടായ ആശങ്കകൾ പരിഹരിക്കണമെന്ന് ആവശ്യപ്പെട്ടും, ഈ പ്രദേശം പതിറ്റാണ്ടുകളായി റവന്യൂ ഭൂമിയും, ജനവാസ മേഖലയുമാണ് എന്ന വസ്തുത അംഗീകരിച്ച്  പിശകുകൾ പരിഹരിച്ച് വ്യക്തത വരുത്തണമെന്നും, ബഫർ സോൺ വിഷയത്തിൽ ജനവാസ മേഖലകളെ ഒഴിവാക്കുന്നതിന് നടപടികൾ സ്വീകരിക്കണമെന്നും അഭ്യർത്ഥിച്ച് മുഖ്യമന്ത്രി പിണറായി വിജയനെയും, വനവകുപ്പ് മന്ത്രി എ. കെ.  ശശീന്ദ്രനെയും  സന്ദർശിച്ച് നിവേദനം നൽകുകയും ചർച്ച നടത്തുകയും ചെയ്തു.പമ്പാവാലി, എയ്ഞ്ചൽവാലി മേഖലകൾ വന മേഖലയായി ചിത്രീകരിക്കപ്പെട്ട സാങ്കേതിക പിഴവ് പരിഹരിക്കുമെന്ന് മുഖ്യമന്ത്രിയും, വനം വകുപ്പ് മന്ത്രിയും ഉറപ്പുനൽകി.

2023 ജനുവരി 19

വന്യജീവി ബോര്‍ഡ് യോഗം ചേര്‍ന്നു

 പമ്പാവാലി, ഏഞ്ചല്‍വാലി-

ജനവാസ മേഖലകളെ ഒഴിവാക്കാന്‍ തീരുമാനം

സംസ്ഥാന വന്യജീവി ബോര്‍ഡിന്റെ യോഗം  മുഖ്യമന്ത്രി പിണറായി വിജയന്റെ അധ്യക്ഷതയില്‍ ഓണ്‍ലൈനായി ചേര്‍ന്നു. തട്ടേക്കാട് പക്ഷിസങ്കേതം, പമ്പാവാലി, ഏഞ്ചല്‍വാലി എന്നീ പ്രദേശങ്ങളെ വന്യജീവി സങ്കേതങ്ങളില്‍ നിന്നും ഒഴിവാക്കുന്നതിനുള്ള അജണ്ട യോഗം പരിഗണിച്ചു.

തട്ടേക്കാട് പക്ഷി സങ്കേതത്തിനകത്തെ ജനവാസ പ്രദേശങ്ങളെ പക്ഷി സങ്കേതത്തില്‍ നിന്നും ഒഴിവാക്കുന്നതിനുള്ള നടപടികള്‍ സ്വീകരിക്കാന്‍ യോഗം തീരുമാനിച്ചു.

പെരിയാര്‍ ടൈഗര്‍ റിസര്‍വ്വിലെ പമ്പാവാലി, ഏഞ്ചല്‍വാലി പ്രദേശങ്ങളെ പെരിയാര്‍ ടൈഗര്‍ റിസര്‍വ്വിന്റെ പരിധിയില്‍ നിന്നും ഒഴിവാക്കാനുള്ള നടപടികള്‍ സ്വീകരിക്കാനും യോഗം തീരുമാനിച്ചു.

പെരിയാര്‍ ടൈഗര്‍ റിസര്‍വ്വ് 1978-ലാണ് രൂപീകൃതമായത്.

യോഗത്തില്‍ സംസ്ഥാന വനം വന്യജീവി ബോര്‍ഡ് ചെയർമാൻ കൂടിയായ മുഖ്യമന്ത്രി പിണറായി വിജയൻ,വൈസ് ചെയര്‍പേഴ്‌സണ്‍ വനം-വന്യജീവി വകുപ്പുമന്ത്രി എ.കെ. ശശീന്ദ്രന്‍, പൂഞ്ഞാര്‍ എം.എല്‍.എ അഡ്വ. സെബാസ്റ്റ്യന്‍ കുളത്തുങ്കല്‍, വനം വകുപ്പ് മേധാവി ബെന്നിച്ചന്‍ തോമസ്, ചീഫ് വൈല്‍ഡ് ലൈഫ് വാര്‍ഡന്‍ഞാൻ ഗംഗാസിംഗ് തുടങ്ങിയവർ യോഗത്തില്‍ പങ്കെടുത്തു.

2024 ജനുവരി 3

19-01-2023-ൽ മുഖ്യമന്ത്രി പിണറായി വിജയൻ്റെ അധ്യക്ഷതയിൽ കൂടിയ സംസ്ഥാന വന്യജീവി ബോർഡ് തീരുമാനം നടപ്പാക്കി കിട്ടുന്നതിന് അനുമതിക്കായി കേന്ദ്ര ഗവൺമെൻ്റിലേക്കയയ്ക്കാൻ വനം മന്ത്രി ഏ കെ ശശീന്ദ്രന് ഓർമ്മപ്പെടുത്തൽ കത്ത് നല്കി

2024 ഏപ്രിൽ 22

പ്രദേശത്തെ ജനങ്ങളുടെ ആശങ്കകളും പരാതികളും കേൾക്കാനും പരിഹാരം ചർച്ച ചെയ്യുന്നതിനുമായി വനം മന്ത്രി ഏ കെ ശശീന്ദ്രനും കോട്ടയം ജില്ലയുടെ ചുമതലയുള്ള മന്ത്രി വി എൻ വാസവനും എം എൽ എയും ത്രിതല പഞ്ചായത്ത് പ്രതിനിധികളും പങ്കെടുത്ത യോഗം എരുമേലി ശബരി ഹാളിൽ നടത്തി

2024 മെയ് 29

മുഖ്യമന്ത്രിയുടെ 19-01-2023 -ൽ സംസ്ഥാന വന്യജീവി ബോർഡിൻ്റെ തീരുമാനത്തിന് കേന്ദ്ര വനം വന്യജീവി വകുപ്പിൻ്റെ അംഗീകാരം കിട്ടുന്നതിന് പരിവേഷ് പോർട്ടൽ വഴി അപ്ലോഡ് ചെയ്ത് സമർപ്പിക്കണമെന്ന കേന്ദ്ര നിർദ്ദേശം നടപ്പാക്കുന്നതിന് വനം വകുപ്പ് ഉദ്യോഗസ്ഥർക്ക് നിർദ്ദേശം നല്കണമെന്ന് അപേക്ഷിച്ച് വനം മന്ത്രി ഏ കെ ശശീന്ദ്രന് കത്ത് നല്കി.

2024 ജൂൺ 6

സെബാസ്റ്റ്യൻ കുളത്തുങ്കൽ എം എൽ എ വനം വകുപ്പ് മന്ത്രി ഏ കെ ശശീന്ദ്രന് വീണ്ടും ഓർമ്മിപ്പിക്കൽ കത്ത് നല്കി

 2024 ഒക്ടോബർ 9

പൂഞ്ഞാർ എം എൽ എ സെബാസ്റ്റ്യൻ കുളത്തുങ്കലിൻ്റെ നിരന്തര പ്രയത്നങ്ങൾ ഫലപ്രാപ്തിയിലേക്ക്

പെരിയാര്‍ കടുവാ സങ്കേതത്തിന്റെ അതിര്‍ത്തിക്കുള്ളില്‍ വരുന്ന ജനവാസമേഖലകളായ പമ്പാവാലി, ഏയ്ഞ്ചല്‍വാലി പ്രദേശങ്ങളും തട്ടേക്കാട് പക്ഷിസങ്കേതത്തിനകത്ത് വരുന്ന ജനവാസമേഖലകളും സങ്കേതത്തിന്റെ പരിധിയില്‍ നിന്നും ഒഴിവാക്കണമെന്ന സംസ്ഥാന സര്‍ക്കാരിന്റെയും സംസ്ഥാന വന്യജീവി ബോര്‍ഡിന്റെയും ശുപാര്‍ശ കേന്ദ്ര വന്യജീവി ബോര്‍ഡ് തത്വത്തില്‍ അംഗീകരിച്ചു. 

ബുധനാഴ്ച (09.10.2024) പരിഗണനയ്ക്ക് വന്ന ഈ വിഷയത്തില്‍ തുടര്‍നടപടികള്‍ക്കായി കേന്ദ്ര വനം പരിസ്ഥിതി മന്ത്രാലയത്തിന്റെ കീഴില്‍ പ്രവര്‍ത്തിക്കുന്ന സംഘം സ്ഥലപരിശോധന നടത്തുന്നതാണ്. വസ്തുതകള്‍ പരിശോധിച്ച ശേഷം ആയത് കേന്ദ്ര വന്യജീവി ബോര്‍ഡിന്റെ അടുത്ത വരുന്ന യോഗത്തില്‍ വീണ്ടും പരിഗണിക്കുന്നതാണ്. അതിന് ശേഷം ഫോറസ്റ്റ് ക്ലിയറന്‍സ് കൂടി ലഭ്യമാകേണ്ടതുണ്ട്.

വിഷയത്തിന്റെ അടിയന്തര സ്വഭാവം പരിഗണിച്ച് കഴിഞ്ഞ അഞ്ചാം തീയതി സസ്ഥാന വന്യജീവി ബോര്‍ഡിന്റെ അടിയന്തര യോഗം മുഖ്യമന്ത്രി വിളിച്ചുചേര്‍ക്കുകയും ഇവ പ്രത്യേക അജണ്ടകളായി പരിഗണിച്ച് കേന്ദ വന്യജീവി ബോര്‍ഡിന് വീണ്ടും ശുപാര്‍ശ സമര്‍പ്പിക്കുകയുമാണ് ഉണ്ടായത്. ഈ വിഷയം ചുരുങ്ങിയ സമരപരിധിക്കുള്ളില്‍ കേന്ദ്ര വന്യജീവി ബോര്‍ഡിന്റെ യോഗത്തിനുള്ള അജണ്ടയില്‍ ഉള്‍പ്പെടുത്തുന്നതിനായി ചീഫ് വൈല്‍ഡ് ലൈഫ് വര്‍ഡന്‍ പ്രമോദ് ജി കൃഷ്ണന്‍ ഐ.എഫ്.എസിനെ സര്‍ക്കാര്‍ പ്രത്യേകം ചുമതലപ്പെടുത്തുകയും അദ്ദേഹം ബന്ധപ്പെട്ട ഉദ്യോഗസ്ഥരുമായി ചര്‍ച്ച നടത്തി ബുധനാഴ്ച (09.10.2024) ചേര്‍ന്ന കേന്ദ്ര വന്യജീവി ബോര്‍ഡിന്റെ അജണ്ടയില്‍ ഉള്‍പ്പെടുത്തുകയുമാണുണ്ടായത്.

പ്രസ്തുത വന്യജീവി സങ്കേതങ്ങളുടെ പരിധിയില്‍ നിന്നും ജനവാസമേഖലകള്‍ പൂര്‍ണ്ണമായും ഒഴിവാക്കുന്നതിനായി സംസ്ഥാന സര്‍ക്കാര്‍ നിശ്ചയദാര്‍ഢ്യത്തോടെയുള്ള തുടര്‍നപടികള്‍ സ്വീകരിക്കുന്നതാണെന്നും വനം മന്ത്രി എ.കെ.ശശീന്ദ്രന്‍ അറിയിച്ചിട്ടുണ്ട്.